محبتوں میں جو مٹ مٹ کے شاہکار ہوا

محبتوں میں جو مٹ مٹ کے شاہکار ہوا

وہ شخص کتنا زمانے میں یادگار ہوا

تری ہی آس میں گزرے ہیں دھوپ چھاؤں سے ہم

تری ہی پیاس میں صحرا بھی خوش گوار ہوا

نہ جانے کتنی بہاروں کی دے گیا خوشبو

وہ اک بدن جو ہمارے گلے کا ہار ہوا

تمہارے بعد تو ہر اک قدم ہے بن باس

ہمارا شہر کے لوگوں میں کب شمار ہوا

خود اپنے آپ سے لینا تھا انتقام مجھے

میں اپنے ہاتھ کے پتھر سے سنگسار ہوا

یہ ایک جان بھی لیتا ہے اشکؔ قسطوں میں

ذرا سا کام بھی اس سے نہ ایک بار ہوا

mohabbaton mein jo mit mit ke shahkar hua

wo shakhs kitna zamane mein yadgar hua

tiri hi as mein guzre hain dhup chhaon se ham

tiri hi pyas mein sahra bhi khush gawar hua

na jane kitni baharon ki de gaya khushbu

wo ik badan jo hamare gale ka har hua

tumhare baad to har ik qadam hai ban-e-bas

hamara shahr ke logon mein kab shumar hua

khud apne ap se lena tha intiqam mujhe

main apne hath ke patthar se sangsar hua

ye ek jan bhi leta hai ashk qiston mein

zara sa kam bhi us se na ek bar hua