ساون کی سنہری جھڑی کے

ساون کی سنہری جھڑی کے

مترنم قطروں کا رقص کچھ تلاشتا ہے

ہواؤں کا رخ

تری جانب موڑنے کو

آسمان کی وسعتوں سے گفتگو جاری ہے

سفید کبوتر

پیغام رسانی کی پہلی اڑان بھرنے کے منتظر ہیں

اس مسکراہٹ کا صدقہ اتارنے کو

دھنک نا کافی ہے

جو مجھ تک تصویر سے نکل کر پہنچی

میں اک نیا رنگ تخلیق کروں گی

تری آواز کا ذائقہ

مری خزاں میں ڈوبی سماعتوں کی

اداس ٹہنیوں پہ رنگیں پتوں کی مدھر

دھن کا موجب ٹھہرا

ترے لہجے کی برستی پھوار

مرے سن رسیدہ وجود کی

بہاروں کی طویل عمری کا سبب ہے

میں تیرے ان کہے اشعار کی

پہلی سامع

اگر اپنی تمام نظمیں

تجھ پہ وار دوں

تو مان جاؤ گے

طلب کی مٹی کا رنگ

طبعی طور پر سبز ہوتا ہے

sawan ki sunahri jhari ke

mutarannim qatron ka raqs kuchh talashta hai

hawaon ka rukh

tiri janib morne ko

asman ki wusaton se guftugu jari hai

safed kabutar

paigham rusani ki pahli uran bharne ke muntazir hain

is muskurahat ka sadqa utarne ko

dhanak na kafi hai

jo mujh tak taswir se nikal kar pahunchi

main ik naya rang takhliq karungi

tiri awaz ka zaiqa

miri khizan mein dubi samaaton ki

udas tahniyon pe rangin patton ki madhur

dhun ka mujib thahra

tire lahje ki barasti phuar

mire sun rasida wajud ki

baharon ki tawil umri ka sabab hai

main tere an kahe ashar ki

pahli same

agar apni tamam nazmen

tujh pe war dun

tu man jaoge

talab ki mitti ka rang

tabai tur par sabz hota hai