یادوں کے حصار میں جکڑے وجود پہ

یادوں کے حصار میں جکڑے وجود پہ

شب نے آخری دستک دی

آنکھ کے ساتویں پردے پہ اک عکس

مسلسل تیر رہا ہے

جس کے باعث

نیند کو اذن حاضری نہیں ملا

ہماری باتوں کے سارے سر سننے والا

نیم کا درخت

اور انگوٹھی میں جڑا عقیق

ایک جیسے ہیں

دل پہ اضطراری کیفیت طاری ہے

دماغ طویل مسافت کی جانب گامزن ہے

بے خیالی میں

ہم سارا دن اک دوسرے کے

ناموں میں سبز رنگ بھرتے ہیں

اس سرخ دائرے میں

چھپے راز کو جاننے پہ کام جاری ہے

ڈھلتی شام کے سائے سے میرے افق

سیاہ ہونے لگے

جذبوں کی صداقت کا دائرہ

جب مکمل ہوا تو

لمس کا رنگ بننے لگا

مری ذات کے مدار میں اک نام کا رقص جاری ہے

سیاہ گلاب کے جذبات کی عکاسی

علم نفسیات سے بالاتر ہے

yadon ke hisar mein jakre wajud pe

shab ne akhiri dastak di

ankh ke satwin parde pe ik aks

musalsal tir raha hai

jis ke bais

nind ko izn-e-haziri nahin mila

hamari baton ke sare sar sunne wala

nim ka darakht

aur anguthi mein jura aqiq

ek jaise hain

dil pe iztirari kaifiyat tari hai

dimagh tawil masafat ki janib gamzan hai

be khayali mein

ham sara din ik dusre ke

namon mein sabz rang bharte hain

is surkh daire mein

chhupe raz ko janne pe kam jari hai

dhalti sham ke sae se mere ufuq

siyah hone lage

jazbon ki sadaqat ka daira

jab mukammal hua to

lams ka rang banne laga

miri zat ke madar mein ik nam ka raqs jari hai

siyah gulab ke jazbat ki akkasi

ilm nafsiyat se balatar hai