اقلیت کہیں کی ہو تہ خنجر ہی رہتی ہے

اقلیت کہیں کی ہو تہ خنجر ہی رہتی ہے

ہلاکت خیز ہاتھوں کے ہزاروں جبر سہتی ہے

خس و خاشاک کی مانند سیل غم میں بہتی ہے

نہ کوئی خواب آنکھوں میں نہ دل میں آسرا کوئی

نہ جوئے خوں سے بچنے کا نظر میں راستہ کوئی

نہ مستقبل کی آوازیں نہ منزل کی صدا کوئی

خود اپنی ہی فضا میں خوف کا احساس ہر لمحہ

عدم محفوظیت کا دور تک غم ناک سناٹا

سہانی ہو کے بھی بے رونق و بے کیف سی دنیا

حقارت کی نظر نفرت کی چنگاری تعاقب میں

مصیبت آگے آگے ذلت و خواری تعاقب میں

جدھر جائے وہیں طوفان بے زاری تعاقب میں

زباں معتوب تہذیب و ثقافت دار کی زد میں

گھر آنگن عزت و ناموس کل تلوار کی زد میں

لبوں کی مسکراہٹ آتشیں یلغار کی زد میں

اقلیت جہاں بھی ہے یہی اس کا مقدر ہے

یہ زخمی بے اماں مخلوق ہر سو زیر خنجر ہے

بتا اے دل یہ غم کی رات ہے یا روز محشر ہے

aqaliyyat kahin ki ho tah-e-khanjar hi rahti hai

halakat khez hathon ke hazaron jabr sahti hai

khas-o-khashak ki manind sail-e-gham mein bahti hai

na koi khwab ankhon mein na dil mein asra koi

na ju-e-khun se bachne ka nazar mein rasta koi

na mustaqbil ki awazen na manzil ki sada koi

khud apni hi faza mein khauf ka ehsas har lamha

adam mahfozet ka daur tak gham nak sannata

suhani ho ke bhi be raunaq-o-be kaif si duniya

hiqarat ki nazar nafrat ki chingari taaqub mein

musibat age age zillat-o-khwari taaqub mein

jidhar jae wahin tufan-e-be zari taaqub mein

zaban maatub tahzib-o-saqafat dar ki zad mein

ghar angan izzat-o-namus kal talwar ki zad mein

labon ki muskurahat atishin yalghar ki zad mein

aqaliyyat jahan bhi hai yahi us ka muqaddar hai

ye zakhmi be aman makhluq har su zer-e-khanjar hai

bata ai dil ye gham ki rat hai ya roz-e-mahshar hai