دبلا پتلا نازک دوراںؔ

دبلا پتلا نازک دوراںؔ

شیشہ جیسا نازک دوراںؔ

غم کی کالی رات کا مارا

اپنے ہی جذبات کا مارا

آٹھوں پہر یوں کھویا کھویا

جیسے گہری سوچ میں ڈوبا

کم ہنسنا عادت میں داخل

خاموشی فطرت میں داخل

شمع کی صورت بزم میں جلنا

گاہ بھڑکنا گاہ پگھلنا

ماتھے پر ہر وقت شکن سی

چہرہ پر آزردہ تھکن سی

چہرہ سے محرومی ظاہر

معصومی مظلومی ظاہر

آنکھیں ہر دم امڈی امڈی

پلکیں ہر دم بھیگی بھیگی

کرب آنکھوں میں درد آنکھوں میں

راہ وفا کی گرد آنکھوں میں

سہما سہما شام بلا سے

روٹھا روٹھا اپنے خدا سے

عقل و خرد سے جی کو چرائے

پاگل پن سے باز نہ آئے

جانے دل میں کس کی لگن ہے

روح میں کس کانٹے کی چبھن ہے

یہ ہے اپنا دوراںؔ یارو

الجھا سلجھا دوراںؔ یارو

لیکن یارو یہی مسافر

راہ وفا کا دکھی مسافر

شانوں پر اک بوجھ کو لادے

راہ طلب میں آگے آگے

دل میں اک مضبوط ارادہ

نظروں میں اک روشن جادہ

غم کی لمبی رات پہ بھاری

ظلم کا اور ظلمت کا شکاری

انسانی تہذیب کا قائل

دنیا کی تعمیر پہ مائل

سعی پیہم اس کی تمنا

جگمگ جگمگ اس کا رستہ

اس کی ساری فکر پریشاں

انسانی تنظیم کی خواہاں

نظمیں اس کی جان مقاصد

روح تمدن شان مقاصد

صبح پہ شیدا شام پہ عاشق

اپنے وطن کے نام پہ عاشق

باتیں ریب و ریا سے خالی

ہر نقش کردار مثالی

پیار انساں کا دل میں چھپائے

درد جہاں سینہ میں بسائے

دوراںؔ ہے یا روح دوراںؔ

گریاں گریاں خنداں خنداں

اس کی دنیا اپنی دنیا

اس دنیا میں ساری دنیا

dubla putla nazuk dauran

shisha jaisa nazuk dauran

gham ki kali rat ka mara

apne hi jazbat ka mara

athon pahar yun khoya khoya

jaise gahri soch mein duba

kam hansna adat mein dakhil

khamoshi fitrat mein dakhil

shama ki surat bazm mein jalna

gah bharakna gah pighalna

mathe par har waqt shikan si

chehra par azurda thakan si

chehra se mahrumi zahir

maasumi mazlumi zahir

ankhen har dam umdi umdi

palken har dam bhigi bhigi

karb ankhon mein dard ankhon mein

rah-e-wafa ki gard ankhon mein

sahma sahma sham bala se

rutha rutha apne khuda se

aql-o-khirad se ji ko churae

pagal pan se baz na ae

jane dil mein kis ki lagan hai

ruh mein kis kante ki chubhan hai

ye hai apna dauran yaro

uljha suljha dauran yaro

lekin yaro yahi musafir

rah-e-wafa ka dukhi musafir

shanon par ik bojh ko lade

rah-e-talab mein age age

dil mein ik mazbut irada

nazron mein ik raushan jada

gham ki lambi rat pe bhari

zulm ka aur zulmat ka shikari

insani tahzib ka qail

duniya ki taamir pe mail

sai paiham us ki tamanna

jagmag jagmag us ka rasta

us ki sari fikr-e-pareshan

insani tanzim ki khwahan

nazmen us ki jan maqasid

ruh tamaddun shan-e-maqasid

subh pe shaida sham pe ashiq

apne watan ke nam pe ashiq

baten raib-o-riya se khali

har naqsh-e-kirdar misali

pyar insan ka dil mein chhupae

dard jahan sina mein basae

dauran hai ya ruh dauran

giryan giryan khandan khandan

us ki duniya apni duniya

is duniya mein sari duniya