روبرو ان کے کوئی حرف ادا کیا کرتے

روبرو ان کے کوئی حرف ادا کیا کرتے

درد تو ہم کو چھپانا تھا صدا کیا کرتے

بے وفائی بھی وفا ہی کی طرح کی اس نے

ایسے انسان سے کرتے تو گلہ کیا کرتے

چھن گئیں ہاتھ اٹھانے سے دعائیں مہنگی

حوصلہ پھر وہ دعاؤں کا بھلا کیا کرتے

کچھ تو آتے رہے امید کے جھونکے ورنہ

اتنا شاداب مجھے آب و ہوا کیا کرتے

اپنے معیار سے گرنا نہیں آیا ہم کو

اپنے کردار کو ہم اس سے سوا کیا کرتے

جب بھی آیا کوئی اچھا ہی خیال آیا ہے

اشکؔ ہم جیسے زمانے کا برا کیا کرتے

rubaru un ke koi harf ada kya karte

dard to ham ko chhupana tha sada kya karte

be wafai bhi wafa hi ki tarah ki us ne

aise insan se karte to gila kya karte

chhin gain hath uthane se duaen mahngi

hausla phir wo duaon ka bhala kya karte

kuchh to ate rahe ummid ke jhonke warna

itna shadab mujhe ab-o-hawa kya karte

apne meyar se girna nahin aya ham ko

apne kirdar ko ham us se siwa kya karte

jab bhi aya koi achchha hi khayal aya hai

ashk ham jaise zamane ka bura kya karte