میں وہ شجر تھا

میں وہ شجر تھا

کہ میرے سائے میں بیٹھنے اور شاخوں پہ جھولنے کی ہزاروں جسموں کو آرزو تھی

زمیں کی آنکھیں درازیٔ عمر کی دعاؤں میں رو رہی تھیں

اور سورج کے ہاتھ تھکتے نہیں تھے مجھ کو سنوارنے میں

کہ میں اک آواز کا سفر تھا

عجب شجر تھا

کہ اس مسافر کا منتظر تھا

جو میرے سائے میں آ کے بیٹھے تو پھر نہ اٹھے

جو میری شاخوں پہ آئے جھولے تو سارے موسم یہیں گزارے

مگر وہ پاگل ہوا کا جھونکا مگر وہ پاگل ہوا کا جھونکا

عجب مسافر تھا رہ گزر کا

جو چھوڑ آیا تھا کتنی شاخیں

مگر لگا یوں کہ جیسے اب وہ شکستہ تر ہے

وہ میرے خوابوں کا ہم سفر ہے

سو میں نے سائے بچھا دئیے تھے

تمام جھولے ہلا دئیے تھے

مگر وہ پاگل ہوا کا جھونکا مگر وہ پاگل ہوا کا جھونکا

عجب مسافر تھا رہ گزر تھا

کہ لمحے بھر میں گزر چکا تھا

میں بے نمو اور بے ثمر تھا

مگر میں آواز کا سفر تھا

سو میری آواز کا اجر تھا

عجب شجر تھا

عجب شجر ہوں

کہ آنے والے سہ کہہ رہا ہوں

اے میرے دل میں اترنے والے

اے مجھ کو شاداب کرنے والے

تجھے مری روشنی مبارک

تجھے مری زندگی مبارک

main wo shajar tha

ke mere sae mein baithne aur shakhon pe jhulne ki hazaron jismon ko arzu thi

zamin ki ankhen darazi-e-umr ki duaon mein ro rahi thin

aur suraj ke hath thakte nahin the mujh ko sanwarne mein

ke main ik awaz ka safar tha

ajab shajar tha

ke is musafir ka muntazir tha

jo mere sae mein a ke baithe to phir na uthe

jo meri shakhon pe ae jhule to sare mausam yahin guzare

magar wo pagal hawa ka jhonka magar wo pagal hawa ka jhonka

ajab musafir tha rah guzar ka

jo chhor aya tha kitni shakhen

magar laga yun ke jaise ab wo shikasta tar hai

wo mere khwabon ka ham safar hai

so main ne sae bichha diye the

tamam jhule hila diye the

magar wo pagal hawa ka jhonka magar wo pagal hawa ka jhonka

ajab musafir tha rah guzar tha

ke lamhe bhar mein guzar chuka tha

main be numu aur be samar tha

magar main awaz ka safar tha

so meri awaz ka ajr tha

ajab shajar tha

ajab shajar hun

ke ane wale sah kah raha hun

ai mere dil mein utarne wale

ai mujh ko shadab karne wale

tujhe miri raushni mubarak

tujhe miri zindagi mubarak