Arooz is now on the App Store, for iPhone and iPad. Download →

All poetry

ابھی تو فٹ پاتھ کے مکینوں کی قسمتوں میں

Mah Talat Zahidi (1953–2020)

ابھی تو فٹ پاتھ کے مکینوں کی قسمتوں میں

گھروں کے سپنے ہیں نامکمل

ابھی تو رستے طویل ہیں

راہ میں گڈھے ہیں

ابھی تو جنگیں ہیں

سرحدیں ہیں

مہاجرت ہے

ابھی تو ذاتوں کا دیوتا مسکرا رہا ہے

ابھی شکستیں ہیں چار جانب

ابھی محبت برہنہ پا ہے

ابھی ہے شہر بتاں کا مرکز

بہت سا ریشم

بہت سی چاندی

بہت سا سونا

ابھی تو انسان تل رہا ہے

ابھی ہوائیں جلا وطن ہیں

ابھی ہے خوشبو گریز پا

کہر ہے دھواں ہے

ابھی سرنگیں ہیں لمبی لمبی

اور ان سرنگوں کے پار کیا ہے

کسے پتا ہے

کہ اب وہ آنکھیں نہیں رہیں جن میں روشنی تھی