Arooz is now on the App Store, for iPhone and iPad. Download →

All poetry

ذرا تم دریچے سے باہر تو جھانکو

Kailash Mahir (b. 1928)

ذرا تم دریچے سے باہر تو جھانکو

کون نالہ کناں ہے یہ کیسی فغاں ہے

اٹاری میں دیکھو

کہیں کوئی بلی نہ گھس آئی ہو

یہ کیا ہے

ابابیل کے جھنڈ کا شور ہے

دریچے کی جالی سے باہر تو دیکھو

ہر اک سمت آہ و بکا ہے

مرا دل ہے جس سے مسلسل ہراساں

مرا دل

جو الفت کے نغموں سے معمور تھا

طلسم بہاراں سے مسرور تھا

وہ دل جس کو سادہ مزاجی کا الفت کا عطیہ ملا ہے

وہ دل شور فریاد آہ و فغاں قہر ماتم کہاں تک سہے گا

دھڑکنیں تھم گئیں

زندگی دم بخود ہے

ذرا پھر دریچے سے باہر تو جھانکو

کون ہے جو لرزتا ہوا سانسیں اکھڑی ہوئی

بھاگتا جا رہا ہے

مری روح گویا شکنجے میں محبوس ہے

اٹھو غور سے اٹھ کے دیکھو

کون ہے یہ

ہراساں ہراساں کماں ایسی صورت

مجھے ایسا لگتا ہے یہ میرا سایہ ہے

جو مجھ سے کہیں پر جدا ہو گیا تھا

کون ہے شب گئے میرے در پر

کس کی دستک ہے یہ

تمہیں پیار کا واسطہ یوں نہ بیٹھے رہو

ایسے عالم میں دروازہ مت کھولنا

دریچوں کے پیچھے سے مت جھانکنا

کیسی پر ہول شب ہے جسے برف باری نے سلگا دیا

جان جاں

انگنت اشک کب سے بہاتا رہا ہوں کہ اب

چشم گریاں میں پانی نہیں ہے

کہاں جا کے ڈھونڈوں وہ اشکوں کے موتی

آنکھ کی جھیل سوکھے تو مدت ہوئی

کہاں جنس شبنم کا بازار ہے

دریچے سے باہر تو دیکھو