بہت دور کیوں بھیڑ سے میں کھڑا ہوں

بہت دور کیوں بھیڑ سے میں کھڑا ہوں

مجھے لوگ کیوں دیر سے تک رہے ہیں

مجھے کیا

دھنک رنگ ہولی کا اڑتا گلال

مچلتا ہوا روپ رنگ

مجھے وقت نے جیسے بچپن سے پہلے جوانی عطا کی

جوانی سے پہلے ہی دل کا لہو منجمد کر دیا

وقت نے توڑ ڈالے کھلونے سبھی لذت شوق کے

میرے رخسار کی جھریاں

آنکھ کی کوڑیاں

ذہن کی کھڑکیاں پاؤں کی بیڑیاں

وقت کی برف باری کا انعام ہیں

بہت دور کیوں بھیڑ سے میں کھڑا ہوں

مجھے لوگ کیوں دیر سے تک رہے ہیں

بھیڑ کیا کون سے لوگ ہیں

مہربانوں کی رشتوں کی ناطوں کی بھیڑ

جنہیں مجھ سے بڑھ کر تمنا ہے تنخواہ کے چیک کی

بھیڑ کیا کون سے لوگ ہیں

مری غم-نوازی سے بڑھ کر جنہیں صرف کافی کا پیالہ بہت ہے

بھیڑ کیا کون سب ہیں

ان حسیناؤں کی جن کے آنچل کبھی خواب میں بھی نہ بھیگے

میری چاہ میں

مجھے بھیڑ سے واسطہ کیا

مجھے کیا دھنک رنگ ہولی کا اڑتا گلال

مجھے اپنے مرقد پہ ہنسنے کا موقع ملا

ابھی برف باری تھمی ہے

ذرا وقت کی چال مدھم ہوئی ہے

bahut dur kyun bhir se main khara hun

mujhe log kyun der se tak rahe hain

mujhe kya

dhanak rang holi ka urta gulal

machalta hua rup rang

mujhe waqt ne jaise bachpan se pahle jawani ata ki

jawani se pahle hi dil ka lahu munjamid kar diya

waqt ne tor dale khilaune sabhi lazzat-e-shauq ke

mere rukhsar ki jhiriyan

ankh ki kauriyan

zehn ki khirkiyan paon ki beriyan

waqt ki barf bari ka inam hain

bahut dur kyun bhir se main khara hun

mujhe log kyun der se tak rahe hain

bhir kya kaun se log hain

mehrbanon ki rishton ki naton ki bhir

jinhen mujh se barh kar tamanna hai tankhwah ke chek ki

bhir kya kaun se log hain

miri gham-nawazi se barh kar jinhen sirf kafi ka pyala bahut hai

bhir kya kaun sab hain

un hasinaon ki jin ke anchal kabhi khwab mein bhi na bhige

meri chah mein

mujhe bhir se wasta kya

mujhe kya dhanak rang holi ka urta gulal

mujhe apne marqad pe hansne ka mauqaa mila

abhi barf bari thami hai

zara waqt ki chal maddham hui hai