ابھی سے ان کے لیے اتنی بے قرار نہ ہو

ابھی سے ان کے لیے اتنی بے قرار نہ ہو

کیا ہے مجھ کو بہت بے قرار چھیڑا ہے

تمہارے شعر سنا کر تمہارے سر کی قسم

سہیلیوں نے مجھے بار بار چھیڑا ہے

کشش نہیں ہے تمہارے بنا بہاروں میں

یہ چھت یہ چاند ستارے اداس لگتے ہیں

چمن کا رنگ نسیم سحر گلاب کے پھول

نہیں ہو تم تو یہ سارے اداس لگتے ہیں

خبر سنی ہے کبھی جب تمہارے آنے کی

میں آئنے میں دلہن بن کے مسکرائی ہوں

گئی ہوں دامن دل کو خوشی سے بھرنے مگر

جہان بھر کی اداسی سمیٹ لائی ہوں

کہیں پہ گائے گئے ہیں جو گیت بابل کے

تو اجنبی سے خیالوں میں کھو گئی ہوں میں

تمہاری یاد کے سینے پہ بارہا آزرؔ

تصورات کا سر رکھ کے سو گئی ہوں میں

تمہیں یقین نہ ہوگا اکیلے کمرے میں

میں اپنی جان سے پیارے خطوط پڑھتی ہوں

تمام رات تمہیں یاد کرتی رہتی ہوں

تمام رات تمہارے خطوط پڑھتی ہوں

تم آ بھی جاؤ کہ گزرے ہوئے دنوں کی طرح

سلگ نہ جائیں کہیں حسرتوں کی تصویریں

اداس پا کے نہ چھیڑیں سہیلیاں مجھ کو

بدل بھی دو مری تنہائیوں کی تقدیریں

abhi se un ke liye itni be qarar na ho

kya hai mujh ko bahut be qarar chhera hai

tumhare sher suna kar tumhare sar ki qasam

saheliyon ne mujhe bar bar chhera hai

kashish nahin hai tumhare bina baharon mein

ye chhat ye chand sitare udas lagte hain

chaman ka rang nasim-e-sahar gulab ke phul

nahin ho tum to ye sare udas lagte hain

khabar suni hai kabhi jab tumhare ane ki

main aine mein dulhan ban ke muskurai hun

gai hun daman-e-dil ko khushi se bharne magar

jahan bhar ki udasi samet lai hun

kahin pe gae gae hain jo git babil ke

tu ajnabi se khayalon mein kho gai hun main

tumhari yad ke sine pe barha azar

tasawwurat ka sar rakh ke so gai hun main

tumhen yaqin na hoga akele kamre mein

main apni jan se pyare khutut parhti hun

tamam rat tumhen yad karti rahti hun

tamam rat tumhare khutut parhti hun

tum a bhi jao ke guzre hue dinon ki tarah

sulag na jaen kahin hasraton ki taswiren

udas pa ke na chheren saheliyan mujh ko

badal bhi do miri tanhaiyon ki taqdiren