سورج نئے برس کا مجھے جیسے ڈس گیا

سورج نئے برس کا مجھے جیسے ڈس گیا

تجھ سے ملے ہوئے مجھے یہ بھی برس گیا

بہتی رہی ندی مرے گھر کے قریب سے

پانی کو دیکھنے کے لیے میں ترس گیا

ملنے کی خواہشیں سبھی دم توڑتی گئیں

دل میں کچھ ایسے خوف بچھڑنے کا بس گیا

دیوار و در جھلستے رہے تیز دھوپ میں

بادل تمام شہر سے باہر برس گیا

تلووں میں نرم گھاس بھی چبھنے لگی نسیمؔ

صحرا کچھ اس طرح مرے پیروں میں بس گیا

suraj nae baras ka mujhe jaise das gaya

tujh se mile hue mujhe ye bhi baras gaya

bahti rahi nadi mire ghar ke qarib se

pani ko dekhne ke liye main taras gaya

milne ki khwahishen sabhi dam torti gain

dil mein kuchh aise khauf bichharne ka bas gaya

diwar-o-dar jhulaste rahe tez dhup mein

badal tamam shahr se bahar baras gaya

talwon mein narm ghas bhi chubhne lagi nasim

sahra kuchh is tarah mire pairon mein bas gaya