کتنی روشن کیوں نہ ہو آزادؔ آخر ایک دن

کتنی روشن کیوں نہ ہو آزادؔ آخر ایک دن

شمع ہستی موت کے جھونکوں سے گل ہو جائے گی

جیسے گہوارے میں سو جاتا ہے طفل شیر خوار

زیست آغوش اجل میں اس طرح سو جائے گی

ماہ و اختر ہیں خجل جس سے وہ چنگاری ضرور

اک نہ اک دن عالم ظلمات میں کھو جائے گی

لیکن اس ظلمت کدے میں ایک نور ایسا بھی ہے

گردش ایام جس کے پاس آ سکتی نہیں

ایک ایسا بھی ہے لوح وقت پر نقش دوام

کوئی شے بھی جس کو عالم سے مٹا سکتی نہیں

موت جھونکے لے کے اٹھے یا بگولے لے کے آئے

عظمت کردار کا شعلہ بجھا سکتی نہیں

kitni raushan kyun na ho azad akhir ek din

sham-e-hasti maut ke jhonkon se gul ho jaegi

jaise gahware mein so jata hai tifl-e-sher khwar

zist aghosh-e-ajal mein is tarah so jaegi

mah-o-akhtar hain khajil jis se wo chingari zarur

ik na ik din alam-e-zulmat mein kho jaegi

lekin is zulmat kade mein ek nur aisa bhi hai

gardish-e-ayyam jis ke pas a sakti nahin

ek aisa bhi hai lauh-e-waqt par naqsh-e-dawam

koi shai bhi jis ko alam se mita sakti nahin

maut jhonke le ke uthe ya bagule le ke ae

azmat kirdar ka shola bujha sakti nahin