خود کو ہجوم دہر میں کھونا پڑا مجھے

خود کو ہجوم دہر میں کھونا پڑا مجھے

جیسے تھے لوگ ویسا ہی ہونا پڑا مجھے

دشمن کو مرتے دیکھ کے لوگوں کے سامنے

دل ہنس رہا تھا آنکھ سے رونا پڑا مجھے

کچھ اس قدر تھے پھول زمیں پر کھلے ہوئے

تاروں کو آسمان میں بونا پڑا مجھے

ایسی شکست تھی کہ کٹی انگلیوں کے ساتھ

کانٹوں کا ایک ہار پرونا پڑا مجھے

کاری نہیں تھا وار مگر ایک عمر تک

آب نمک سے زخم کو دھونا پڑا مجھے

آساں نہیں ہے لکھنا غم دل کی واردات

اپنا قلم لہو میں ڈبونا پڑا مجھے

اتنی طویل و سرد شب ہجر تھی نسیمؔ

کتنی ہی بار جاگنا سونا پڑا مجھے

khud ko hujum-e-dahr mein khona para mujhe

jaise the log waisa hi hona para mujhe

dushman ko marte dekh ke logon ke samne

dil hans raha tha ankh se rona para mujhe

kuchh is qadar the phul zamin par khule hue

taron ko asman mein bona para mujhe

aisi shikast thi ke kati ungliyon ke sath

kanton ka ek har pirona para mujhe

kari nahin tha war magar ek umr tak

ab-e-namak se zakhm ko dhona para mujhe

asan nahin hai likhna gham-e-dil ki wardat

apna qalam lahu mein dubona para mujhe

itni tawil-o-sard shab-e-hijr thi nasim

kitni hi bar jagna sona para mujhe