سوچتا ہوں

سوچتا ہوں

وقت کی گردن پکڑ کر

ریشمی اسکارف کا پھندا لگا کر

کھینچ لوں

اور اتنی زور سے چیخوں

زمیں سے

آسماں تک

صرف میری چیخ ہی کا شور گونجے

وقت کی مرتی ہوئی آواز کوئی سن نہ پائے

سوچتا ہوں

وسعت آفاق میں پرواز کر کے

رات کی آنکھوں میں تاریکی کا پردہ ڈال کر میں

چاند تاروں کو چرا لاؤں زمیں پر

اور تھوڑی دیر

بچوں کی طرح خوش ہو کے کھیلوں

کھیلنے سے بھی جب اپنا دل نہ بہلے

ایک پتھر پر پٹخ کر

ہر کھلونے کو میں چکنا چور کر دوں

سوچتا ہوں

آسماں سے چھین کر

جلتے ہوئے سورج کی تھالی

ایک کشتی کی طرح

گہرے سمندر میں چلاؤں

اور اس پر ساری دنیا کو بٹھا کر

غرق کر دوں

سوچتا ہوں

سوچتے ہی سوچتے

میں خود ہی اک دن

سوچ کے آتش کدہ میں جل نہ جاؤں

sochta hun

waqt ki gardan pakar kar

reshmi iskarf ka phanda laga kar

khinch lun

aur itni zor se chikhun

zamin se

asman tak

sirf meri chikh hi ka shor gunje

waqt ki marti hui awaz koi sun na pae

sochta hun

wusat-e-afaq mein parwaz kar ke

rat ki ankhon mein tariki ka parda dal kar main

chand taron ko chura laun zamin par

aur thori der

bachchon ki tarah khush ho ke khelun

khelne se bhi jab apna dil na bahle

ek patthar par patakh kar

har khilaune ko main chukna chur kar dun

sochta hun

asman se chhin kar

jalte hue suraj ki thali

ek kashti ki tarah

gahre samundar mein chillaun

aur us par sari duniya ko bitha kar

gharq kar dun

sochta hun

sochte hi sochte

main khud hi ik din

soch ke atish kada mein jal na jaun