میرے کاندھے پہ بیٹھا کوئی

میرے کاندھے پہ بیٹھا کوئی

پڑھتا رہتا ہے انجیل و قرآن و وید

مکھیاں کان میں بھنبھناتی ہیں

زخمی ہیں کان

اپنی آواز کیسے سنوں

رانا ہندو تھا اکبر مسلمان تھا

سنجے وہ پہلا انسان تھا

ہستناپور میں جس نے قبل مسیح

ٹیلی ویژن بنایا

اور گھر بیٹھے اک اندھے راجہ کو

یدھ کا تماشہ دکھایا

آدمی چاند پر آج اترا تو کیا

یہ ترقی نہیں

اب سے پہلے، بہت پہلے

جب ذرہ ٹوٹا نہ تھا

چشمہ جوہر کا پھوٹا نہ تھا

فرش سے عرش تک جا چکا ہے کوئی

یہ اور ایسی بہت سی جہالت کی باتیں

میرے کاندھے پہ ہوتی ہیں

کاندھے جھکے جا رہے ہیں

قد مرا رات دن گھٹ رہا ہے

سر کہیں پاؤں سے مل نہ جائے

mere kandhe pe baitha koi

parhta rahta hai injil-o-quran-o-wed

makkhiyan kan mein bhimbhinati hain

zakhmi hain kan

apni awaz kaise sunun

rana hindu tha akbar musalman tha

sunjai wo pahla insan tha

hastanapor mein jis ne qabl-e-masih

teli wizhan banaya

aur ghar baithe ik andhe raja ko

yudh ka tamasha dikhaya

admi chand par aj utra to kya

ye taraqqi nahin

ab se pahle, bahut pahle

jab zarra tuta na tha

chashma jauhar ka phuta na tha

farsh se arsh tak ja chuka hai koi

ye aur aisi bahut si jahalat ki baten

mere kandhe pe hoti hain

kandhe jhuke ja rahe hain

qad mira rat din ghut raha hai

sar kahin paon se mil na jae