لو پو پھٹی وہ چھپ گئی تاروں کی انجمن

لو پو پھٹی وہ چھپ گئی تاروں کی انجمن

لو جام مہر سے وہ چھلکنے لگی کرن

کھچنے لگا نگاہ میں فطرت کا بانکپن

جلوے زمیں پہ برسے زمیں بن گئی دلہن

گونجے ترانے صبح کا اک شور ہو گیا

عالم مئے بقا میں شرابور ہو گیا

پھولی شفق فضا میں حنا تلملا گئی

اک موج رنگ کانپ کے عالم پہ چھا گئی

کل چاندنی سمٹ کے گلوں میں سما گئی

ذرے بنے نجوم زمیں جگمگا گئی

چھوڑا سحر نے تیرگیٔ شب کو کاٹ کے

اڑنے لگی ہوا میں کرن اوس چاٹ کے

مچلی جبین شرق پہ اس طرح موج نور

لہرا کے تیرنے لگی عالم میں برق طور

اڑنے لگی شمیم چھلکنے لگا سرور

کھلنے لگے شگوفے چہکنے لگے طیور

جھونکے چلے ہوا کے شجر جھومنے لگے

مستی میں پھول کانٹوں کا منہ چومنے لگے

تھم تھم کے ضو فشاں ہوا ذروں پہ آفتاب

چھڑکا ہوا نے سبزۂ خوابیدہ پر گلاب

مرجھائی پتیوں میں مچلنے لگا شباب

لرزش ہوئی گلوں کو برسنے لگی شراب

رندان مست اور بھی سرمست ہو گئے

تھرا کے ہونٹ جام میں پیوست ہو گئے

دوشیزہ ایک خوش قد و خوش رنگ و خوبرو

مالن کی نور دیدہ گلستاں کی آبرو

مہکا رہی ہے پھولوں سے دامان آرزو

طفلی لئے ہے گود میں طوفان رنگ و بو

رنگینیوں میں کھیلی گلوں میں پلی ہوئی

نورس کلی میں قوس قزح ہے ڈھلی ہوئی

مستی میں رخ پہ بال پریشاں کئے ہوئے

بادل میں شمع طور فروزاں کئے ہوئے

ہر سمت نقش پا سے چراغاں کئے ہوئے

آنچل کو بار گل سے گلستاں کئے ہوئے

لہرا رہی ہے باد سحر پاؤں چوم کے

پھرتی ہے تیتری سی غضب جھوم جھوم کے

زلفوں میں تاب سنبل پیچاں لئے ہوئے

عارض میں شوخ رنگ گلستاں لئے ہوئے

آنکھوں میں روح بادۂ عرفاں لئے ہوئے

ہونٹوں میں آب لعل بدخشاں لئے ہوئے

فطرت نے تول تول کے چشم قبول میں

سارا چمن نچوڑ دیا ایک پھول میں

اے حور باغ اتنی خودی سے نہ کام لے

اڑ کر شمیم گل کہیں آنچل نہ تھام لے

کلیوں کا لے پیام سحر کا سلام لے

کیفیؔ سے حسن دوست کا تازہ کلام لے

شاعر کا دل ہے مفت میں کیوں درد مند ہو

اک گل ادھر بھی نظم اگر یہ پسند ہو

lo pau phati wo chhup gai taron ki anjuman

lo jam-e-mehr se wo chhalakne lagi kiran

khichne laga nigah mein fitrat ka bankpan

jalwe zamin pe barse zamin ban gai dulhan

gunje tarane subh ka ik shor ho gaya

alam mai-e-baqa mein sharabur ho gaya

phuli shafaq faza mein hina tilmila gai

ik mauj-e-rang kanp ke alam pe chha gai

kal chandni simat ke gulon mein sama gai

zarre bane nujum zamin jagmaga gai

chhora sahar ne tirgi-e-shab ko kat ke

urne lagi hawa mein kiran os chat ke

machli jabin-e-sharq pe is tarah mauj-e-nur

lahra ke tairne lagi alam mein barq-e-tur

urne lagi shamim chhalakne laga surur

khulne lage shagufe chahakne lage tuyur

jhonke chale hawa ke shajar jhumne lage

masti mein phul kanton ka munh chumne lage

tham tham ke zau fishan hua zarron pe aftab

chhirka hawa ne sabza-e-khwabida par gulab

murjhai pattiyon mein machalne laga shabab

larzish hui gulon ko barasne lagi sharab

rindan-e-mast aur bhi sarmast ho gae

tharra ke hont jam mein paiwast ho gae

doshiza ek khush qad-o-khush rang-o-khubru

malan ki nur-e-dida gulistan ki abru

mahka rahi hai phulon se daman-e-arzu

tifli liye hai god mein tufan-e-rang-o-bu

ranginiyon mein kheli gulon mein pali hui

nauras kali mein qaus-e-quzah hai dhali hui

masti mein rukh pe bal pareshan kiye hue

badal mein sham-e-tur farozan kiye hue

har samt naqsh-e-pa se charaghan kiye hue

anchal ko bar-e-gul se gulistan kiye hue

lahra rahi hai bad-e-sahar paon chum ke

phirti hai titri si ghazab jhum jhum ke

zulfon mein tab sumbul-e-pechan liye hue

ariz mein shokh rang-e-gulistan liye hue

ankhon mein ruh bada-e-irfan liye hue

honton mein ab laal-e-badakhshan liye hue

fitrat ne tol tol ke chashm-e-qubul mein

sara chaman nichor diya ek phul mein

ai hur-e-bagh itni khudi se na kam le

ur kar shamim-e-gul kahin anchal na tham le

kaliyon ka le payam-e-sahar ka salam le

kaifi se husn-e-dost ka taza kalam le

shayar ka dil hai muft mein kyun dard mand ho

ik gul idhar bhi nazm agar ye pasand ho