یہ بجھی سی شام یہ سہمی ہوئی پرچھائیاں

یہ بجھی سی شام یہ سہمی ہوئی پرچھائیاں

خون دل بھی اس فضا میں رنگ بھر سکتا نہیں

آ اتر آ کانپتے ہونٹوں پہ اے مایوس آہ

سقف زنداں پر کوئی پرواز کر سکتا نہیں

جھلملائے میری پلکوں پہ مہ و خور بھی تو کیا؟

اس اندھیرے گھر میں اک تارا اتر سکتا نہیں

لوٹ لی ظلمت نے روئے ہند کی تابندگی

رات کے کاندھے پہ سر رکھ کر ستارے سو گئے

وہ بھیانک آندھیاں، وہ ابتری، وہ خلفشار

کارواں بے راہ ہو نکلا، مسافر کھو گئے

ہیں اسی ایوان بے در میں یقیناً رہنما

آ کے کیوں دیوار تک نقش قدم گم ہو گئے

دیکھ اے جوش عمل وہ سقف یہ دیوار ہے

ایک روزن کھول دینا بھی کوئی دشوار ہے

ye bujhi si sham ye sahmi hui parchhaiyan

khun-e-dil bhi is faza mein rang bhar sakta nahin

a utar a kanpte honton pe ai mayus ah

saqaf-e-zindan par koi parwaz kar sakta nahin

jhilmilae meri palkon pe mah-o-khur bhi to kya?

is andhere ghar mein ik tara utar sakta nahin

laut li zulmat ne ru-e-hind ki tabindagi

rat ke kandhe pe sar rakh kar sitare so gae

wo bhayanak andhiyan, wo abtari, wo khalfishar

karwan be rah ho nikla, musafir kho gae

hain isi aiwan-e-be dar mein yaqinan rahnuma

a ke kyun diwar tak naqsh-e-qadam gum ho gae

dekh ai josh-e-amal wo saqaf ye diwar hai

ek rauzan khol dena bhi koi dushwar hai