جانے والوں کے لیے تو اور کیا لے جائے گا

جانے والوں کے لیے تو اور کیا لے جائے گا

دیکھ لے دنیا جہاں تک راستہ لے جائے گا

خواہش گفتار رہ جائے گی پھر زیر زباں

اذن تو دے دے گا لیکن حوصلہ لے جائے گا

گونج بن کر لوٹ جائے گی مری فریاد بھی

شب کا سناٹا کہاں میری صدا لے جائے گا

دل سے مٹ جائے گا اک دن دیکھنے ملنے کا شوق

جتنے منظر ہیں وہ آنکھوں میں سجا لے جائے گا

لطف پھر آئے گا کیا سیاحیٔ دل میں نسیمؔ

اس کھنڈر سے جو ملے گا وہ اٹھا لے جائے گا

jane walon ke liye to aur kiya le jaega

dekh le duniya jahan tak rasta le jaega

khwahish guftar rah jaegi phir zer-e-zaban

izn to de dega lekin hausla le jaega

gunj ban kar laut jaegi miri fariyad bhi

shab ka sannata kahan meri sada le jaega

dil se mit jaega ik din dekhne milne ka shauq

jitne manzar hain wo ankhon mein saja le jaega

lutf phir aega kya sayyahi-e-dil mein nasim

is khandar se jo milega wo utha le jaega