دوست! میں دیکھ چکا تاج محل

دوست! میں دیکھ چکا تاج محل

مرمریں مرمریں پھولوں سے ابلتا ہیرا

چاند کی آنچ میں دہکے ہوئے سیمیں مینار

ذہن شاعر سے یہ کرتا ہوا چشمک پیہم

ایک ملکہ کا ضیا پوش و فضا تاب مزار

خود بہ خود پھر گئے نظروں میں بہ انداز سوال

وہ جو رستوں پہ پڑے رہتے ہیں لاشوں کی طرح

خشک ہو کر جو سمٹ جاتے ہیں بے رس اعصاب

دھوپ میں کھوپڑیاں بجتی ہیں تاشوں کی طرح

دوست میں دیکھ چکا تاج محل

یہ دھڑکتا ہوا گنبد میں دل شاہجہاں

یہ در و بام پہ ہنستا ہوا ملکہ کا شباب

جگمگاتا ہے ہر اک تہ سے مذاق تفریق

اور تاریخ اڑھاتی ہے محبت کی نقاب

چاندنی اور یہ محل عالم حیرت کی قسم

دودھ کی نہر میں جس طرح ابال آ جائے

ایسے سیاح کی نظروں میں کھپے کیا یہ سماں

جس کو فرہاد کی قسمت کا خیال آ جائے

دوست میں دیکھ چکا تاج محل

یہ دمکتی ہوئی چوکھٹ یہ طلا پوش کلس

انہیں جلووں نے دیا قبر پرستی کو رواج

ماہ و انجم بھی ہوئے جاتے ہیں مجبور سجود

واہ آرام گہ ملکۂ معبود مزاج

دیدنی قصر نہیں دیدنی تقسیم ہے یہ

روئے ہستی پہ دھواں قبر پہ رقص انوار

پھیل جائے اسی روضہ کا جو سمٹا دامن

کتنے جاں دار جنازوں کو بھی مل جائے مزار

دوست میں دیکھ چکا تاج محل

dost! mein dekh chuka taj-e-mahal

marmarin marmarin phulon se ubalta hira

chand ki anch mein dahke hue simin minar

zehn-e-shayar se ye karta hua chashmak paiham

ek malaka ka ziya posh-o-faza tab-e-mazar

khud ba khud phir gae nazron mein ba andaz-e-sawal

wo jo raston pe pare rahte hain lashon ki tarah

khushk ho kar jo simat jate hain be ras aasab

dhup mein khopriyan bajti hain tashon ki tarah

dost mein dekh chuka taj-e-mahal

ye dharakta hua gumbad mein dil-e-shahjahan

ye dar-o-bam pe hansta hua malaka ka shabab

jagmagata hai har ik tah se mazaq-e-tafriq

aur tarikh urhati hai mohabbat ki naqab

chandni aur ye mahal alam-e-hairat ki qasam

dudh ki nahr mein jis tarah ubal a jae

aise sayyah ki nazron mein khape kya ye saman

jis ko farhad ki qismat ka khayal a jae

dost mein dekh chuka taj-e-mahal

ye damakti hui chaukhat ye tila posh kalas

unhen jalwon ne diya qabr parasti ko riwaj

mah-o-anjum bhi hue jate hain majbur-e-sujud

wah aram gah malaka-e-maabud mizaj

didani qasr nahin didani taqsim hai ye

ru-e-hasti pe dhuan qabr pe raqs-e-anwar

phail jae isi rauza ka jo simta daman

kitne jan dar janazon ko bhi mil jae mazar

dost mein dekh chuka taj-e-mahal