شگفتگی کا لطافت کا شاہکار ہو تم

شگفتگی کا لطافت کا شاہکار ہو تم

فقط بہار نہیں حاصل بہار ہو تم

جو ایک پھول میں ہے قید وہ گلستاں ہو

جو اک کلی میں ہے پنہاں وہ لالہ زار ہو تم

حلاوتوں کی تمنا، ملاحتوں کی مراد

غرور کلیوں کا، پھولوں کا انکسار ہو تم

جسے ترنگ میں فطرت نے گنگنایا ہے

وہ بھیرویں ہو، وہ دیپک ہو وہ ملہار ہو تم

تمہارے جسم میں خوابیدہ ہیں ہزاروں راگ

نگاہ چھیڑتی ہے جس کو وہ ستار ہو تم

جسے اٹھا نہ سکی جستجو وہ موتی ہو

جسے نہ گوندھ سکی آرزو وہ ہار ہو تم

جسے نہ بوجھ سکا عشق وہ پہیلی ہو

جسے سمجھ نہ سکا پیار بھی وہ پیار ہو تم

خدا کرے کسی دامن میں جذب ہو نہ سکیں

یہ میرے اشک حسیں جن سے آشکار ہو تم

shaguftagi ka latafat ka shahkar ho tum

faqat bahar nahin hasil-e-bahar ho tum

jo ek phul mein hai qaid wo gulistan ho

jo ik kali mein hai pinhan wo lala zar ho tum

halawaton ki tamanna, malahaton ki murad

ghurur kaliyon ka, phulon ka inkisar ho tum

jise tarang mein fitrat ne gungunaya hai

wo bherwen ho, wo dipak ho wo malhar ho tum

tumhare jism mein khwabida hain hazaron rag

nigah chherti hai jis ko wo sitar ho tum

jise utha na saki justuju wo moti ho

jise na gundh saki arzu wo har ho tum

jise na bojh saka ishq wo paheli ho

jise samajh na saka pyar bhi wo pyar ho tum

khuda kare kisi daman mein jazb ho na saken

ye mere ashk hasin jin se ashkar ho tum