بن گیا ہے جسم گزرے قافلوں کی گرد سا

بن گیا ہے جسم گزرے قافلوں کی گرد سا

کتنا ویراں کر گیا مجھ کو مرا ہم درد سا

کیا ابھی تک اس کا رستہ روکتی ہے کوئی سوچ

میرے ہاتھوں میں ہے اس کا ہاتھ لیکن سرد سا

اس طرح گھل مل گیا آ کر نئے ماحول میں

وہ بھی اب لگتا ہے میرے گھر کا ہی اک فرد سا

جذب تھا جیسے کوئی سورج ہی اس کے جسم میں

دور سے وہ سنگ لگتا تھا بظاہر سرد سا

آج تک آنکھوں میں ہے منظر بچھڑنے کا نسیمؔ

پیرہن میلا سا اس کا اور چہرا زرد سا

ban gaya hai jism guzre qafilon ki gard sa

kitna wiran kar gaya mujh ko mira ham dard sa

kya abhi tak us ka rasta rokti hai koi soch

mere hathon mein hai us ka hath lekin sard sa

is tarah ghul mil gaya a kar nae mahaul mein

wo bhi ab lagta hai mere ghar ka hi ik fard sa

jazb tha jaise koi suraj hi us ke jism mein

dur se wo sang lagta tha bazahir sard sa

aj tak ankhon mein hai manzar bichharne ka nasim

pairahan maila sa us ka aur chehra zard sa