مدتوں میں اک اندھے کنویں میں اسیر

مدتوں میں اک اندھے کنویں میں اسیر

سر پٹکتا رہا گڑگڑاتا رہا

روشنی چاہیئے، چاندنی چاہیئے، زندگی چاہیئے

روشنی پیار کی، چاندنی یار کی، زندگی دار کی

اپنی آواز سنتا رہا رات دن

دھیرے دھیرے یقیں دل کو آتا رہا

سونے سنسار میں

بے وفا یار میں

دامن دار میں

روشنی بھی نہیں

چاندنی بھی نہیں

زندگی بھی نہیں

زندگی ایک رات

واہمہ کائنات

آدمی بے بساط

لوگ کوتاہ قد

شہر شہر حسد

گاؤں ان سے بھی بد

ان اندھیروں نے جب پیس ڈالا مجھے

پھر اچانک کنویں نے اچھالا مجھے

اپنے سینے سے باہر نکالا مجھے

سیکڑوں مصر تھے سامنے

سیکڑوں اس کے بازار تھے

ایک بوڑھی زلیخا نہیں

جانے کتنے خریدار تھے

بڑھتا جاتا تھا یوسف کا مول

لوگ بکنے کو تیار تھے

کھل گئے مہ جبینوں کے سر

ریشمی چادریں ہٹ گئیں

پلکیں جھپکیں نہ نظریں جھکیں

مرمریں انگلیاں کٹ گئیں

ہاتھ دامن تک آیا کوئی

دھجیاں دور تک بٹ گئیں

میں نے ڈر کے لگا دی کنویں میں چھلانگ

سر پٹکنے لگا پھر اسی کرب سے

پھر اسی درد سے گڑگڑانے لگا

روشنی چاہیئے چاندنی چاہیئے زندگی چاہیئے

muddaton mein ik andhe kuen mein asir

sar patakta raha gurgarata raha

raushni chahiye, chandni chahiye, zindagi chahiye

raushni pyar ki, chandni yar ki, zindagi dar ki

apni awaz sunta raha rat din

dhire dhire yaqin dil ko ata raha

sone sansar mein

be wafa yar mein

daman dar mein

raushni bhi nahin

chandni bhi nahin

zindagi bhi nahin

zindagi ek rat

wahima kainat

admi be bisat

log kotah qad

shahr shahr hasad

gaon un se bhi bad

in andheron ne jab pais dala mujhe

phir achanak kuen ne uchhala mujhe

apne sine se bahar nikala mujhe

saikron misr the samne

saikron us ke bazar the

ek burhi zulekha nahin

jane kitne kharidar the

barhta jata tha yusuf ka mol

log bikne ko tayyar the

khul gae mah jabinon ke sar

reshmi chadaren hat gain

palken jhapken na nazren jhuken

marmarin ungliyan kat gain

hath daman tak aya koi

dhajjiyan dur tak bat gain

main ne dar ke laga di kuen mein chhalang

sar patakne laga phir isi karb se

phir isi dard se gurgarane laga

raushni chahiye chandni chahiye zindagi chahiye