آج کی رات بہت گرم ہوا چلتی ہے

آج کی رات بہت گرم ہوا چلتی ہے

آج کی رات نہ فٹ پاتھ پہ نیند آئے گی

سب اٹھو، میں بھی اٹھوں تم بھی اٹھو، تم بھی اٹھو

کوئی کھڑکی اسی دیوار میں کھل جائے گی

یہ زمیں تب بھی نگل لینے پہ آمادہ تھی

پاؤں جب ٹوٹتی شاخوں سے اتارے ہم نے

ان مکانوں کو خبر ہے نہ مکینوں کو خبر

ان دنوں کی جو گپھاؤں میں گزارے ہم نے

ہاتھ ڈھلتے گئے سانچے میں تو تھکتے کیسے

نقش کے بعد نئے نقش نکھارے ہم نے

کی یہ دیوار بلند، اور بلند، اور بلند

بام و در اور، ذرا اور سنوارے ہم نے

آندھیاں توڑ لیا کرتی تھیں شمعوں کی لویں

جڑ دیئے اس لیے بجلی کے ستارے ہم نے

بن گیا قصر تو پہرے پہ کوئی بیٹھ گیا

سو رہے خاک پہ ہم شورش تعمیر لیے

اپنی نس نس میں لیے محنت پیہم کی تھکن

بند آنکھوں میں اسی قصر کی تصویر لیے

دن پگھلتا ہے اسی طرح سروں پر اب تک

رات آنکھوں میں کھٹکتی ہے سیہ تیر لیے

آج کی رات بہت گرم ہوا چلتی ہے

آج کی رات نہ فٹ پاتھ پہ نیند آئے گی

سب اٹھو، میں بھی اٹھوں تم بھی اٹھو، تم بھی اٹھو

کوئی کھڑکی اسی دیوار میں کھل جائے گی

aj ki rat bahut garm hawa chalti hai

aj ki rat na fit path pe nind aegi

sab utho, mein bhi uthun tum bhi utho, tum bhi utho

koi khirki isi diwar mein khul jaegi

ye zamin tab bhi nigal lene pe amada thi

paon jab tutti shakhon se utare ham ne

in makanon ko khabar hai na makinon ko khabar

in dinon ki jo guphaon mein guzare ham ne

hath dhalte gae sanche mein to thakte kaise

naqsh ke baad nae naqsh nikhare ham ne

ki ye diwar buland, aur buland, aur buland

bam-o-dar aur, zara aur sanware ham ne

andhiyan tor liya karti thin shamon ki lawen

jur diye is liye bijli ke sitare ham ne

ban gaya qasr to pahre pe koi baith gaya

so rahe khak pe ham shorish-e-taamir liye

apni nas nas mein liye mehnat paiham ki thakan

band ankhon mein isi qasr ki taswir liye

din pighalta hai isi tarah saron par ab tak

rat ankhon mein khatakti hai siyah tir liye

aj ki rat bahut garm hawa chalti hai

aj ki rat na fit path pe nind aegi

sab utho, mein bhi uthun tum bhi utho, tum bhi utho

koi khirki isi diwar mein khul jaegi