زندگی بہتی رہی آب رواں کی مانند

زندگی بہتی رہی آب رواں کی مانند

کبھی ہلکی سی کبھی خواب گراں کی مانند

وقت کی لہروں پے معصوم سا چہرہ ابھرا

اور پھر ہو گیا گم وہم و گماں کی مانند

دل ربا چہرے پہ کیوں چھایا قضا کا سایا

کیوں بہاروں کا ہوا رنگ خزاں کے مانند

ہو گئی کیوں وہ چہکتی ہوئی بلبل خاموش

کیوں گرا پھول جو گلشن میں تھا جاں کی مانند

رند جھوم اٹھتے تھے مستان ادا پر جس کی

اب یہاں کون ہے اس پیر مغاں کی مانند

خاک اڑتی ہے جہاں قہقہے ہوتے تھے بلند

نغمۂ بزم ہے اب آہ و فغاں کی مانند

گرمیٔ دل تھی وہی اس کی وہی ذوق طلب

ڈھلتے سایوں میں وہ تھا مرد جواں کی مانند

عمر بھر یاد چتر ہم کو رلائے گی حبیبؔ

غم ستائے گی سدا درد نہاں کی مانند

zindagi bahti rahi ab-e-rawan ki manind

kabhi halki si kabhi khwab-e-giran ki manind

waqt ki lahron pe maasum sa chehra ubhra

aur phir ho gaya gum wahm-o-guman ki manind

dil ruba chehre pe kyun chhaya qaza ka saya

kyun baharon ka hua rang-e-khizan ke manind

ho gai kyun wo chahakti hui bulbul khamosh

kyun gira phul jo gulshan mein tha jan ki manind

rind jhum uthte the mustan ada par jis ki

ab yahan kaun hai is pir-e-mughan ki manind

khak urti hai jahan qahqahe hote the buland

naghma-e-bazm hai ab ah-o-fughan ki manind

garmi-e-dil thi wahi us ki wahi zauq-e-talab

dhalte sayon mein wo tha mard-e-jawan ki manind

umr bhar yad chatar ham ko rulaegi habib

gham sataegi sada dard-e-nihan ki manind