دل کے بجھے چراغ جلاتی چلی گئی

دل کے بجھے چراغ جلاتی چلی گئی

قدموں سے سوئے فتنے جگاتی چلی گئی

شعلہ تھا وہ لپکتا ہوا یا کہ برق تھی

رگ رگ میں آگ سی وہ لگاتی چلی گئی

یا جسم کو وہ خم کہ کماں کام دیو کی

کس کس ادا سے تیر چلاتی چلی گئی

پھولوں کی ڈالیوں کی لچک بازوؤں میں تھی

بل نازکی کے بوجھ سے کھاتی چلی گئی

نظم حسیں کہیں کہ اسے ہم غزل کا شعر

اہل نظر کو وجد میں لاتی چلی گئی

ایک جنبش نظر سے لچکتی کمر سے وہ

کیا کیا فسانے دل کے سناتی چلی گئی

رخ پر برہ کا رنگ ہے یا کہ ملن کی آس

دنیائے سوز و ساز دکھاتی چلی گئی

خوابوں کی بستیوں میں اڑائے لیے پھری

یادوں کا ایک شہر بساتی چلی گئی

اس دور مے کشی میں کسے ہوش تھا حبیبؔ

کب آئی اور کب وہ پلاتی چلی گئی

dil ke bujhe charagh jalati chali gai

qadmon se su-e-fitne jagati chali gai

shola tha wo lapakta hua ya ke barq thi

rag rag mein ag si wo lagati chali gai

ya jism ko wo kham ke kaman kam dew ki

kis kis ada se tir chillati chali gai

phulon ki daliyon ki lachak bazuon mein thi

bal nazuki ke bojh se khati chali gai

nazm-e-hasin kahin ke use ham ghazal ka sher

ahl-e-nazar ko wajd mein lati chali gai

ek jumbish-e-nazar se lachakti kamar se wo

kya kya fasane dil ke sunati chali gai

rukh par barra ka rang hai ya ke milan ki as

duniya-e-soz-o-saz dikhati chali gai

khwabon ki bastiyon mein urae liye phiri

yadon ka ek shahr basati chali gai

is daur-e-mai kashi mein kise hosh tha habib

kab ai aur kab wo pilati chali gai