کیا نغمہ ہائے کیف کا دریا بہا گیا

کیا نغمہ ہائے کیف کا دریا بہا گیا

خود حسن کو جہاں میں حسیں تر بنا گیا

اے شاعر شباب و نوا سنج زندگی

مثل بہار آ کے تو عالم پے چھا گیا

تو حسن کی نگاہ تھا اور عشق کی زباں

گیتوں میں رنگ و روپ کی دنیا بسا گیا

رنگینیاں بہار کی ہر سو بکھر گئی

بے کیفیٔ خزاں کا کبھی رنگ چھا گیا

ٹوٹے ہوئے دلوں کی صدا لب پہ آ گئی

نغمہ کبھی تو کیف و مسرت کا گا گیا

انساں کے غم میں سینۂ قدرت بھی شق ہوا

ماں کی طرح سے موت کو بھی پیار آ گیا

افسردہ زندگی کو ملی تجھ سے تازگی

جو دل تڑپ رہا تھا وہ آرام پا گیا

تو کر کے سر بلند وطن کے وقار کو

دل میں ہر ایک فرد وطن کے سما گیا

ہندوستاں کو دے کے دو عالم کی عظمتیں

تو بے نوا فقیر سا گاتا چلا گیا

kya naghma ha-e-kaif ka dariya baha gaya

khud husn ko jahan mein hasin tar bana gaya

ai shayar-e-shabab-o-nawa sanj-e-zindagi

misl-e-bahar a ke to alam pe chha gaya

tu husn ki nigah tha aur ishq ki zaban

giton mein rang-o-rup ki duniya basa gaya

ranginiyan bahar ki har su bikhar gai

be kaifi-e-khizan ka kabhi rang chha gaya

tute hue dilon ki sada lab pe a gai

naghma kabhi to kaif-o-masarrat ka ga gaya

insan ke gham mein sina-e-qudrat bhi shaqq hua

man ki tarah se maut ko bhi pyar a gaya

afsurda zindagi ko mili tujh se tazgi

jo dil tarap raha tha wo aram pa gaya

tu kar ke sar buland watan ke waqar ko

dil mein har ek fard watan ke sama gaya

hindostan ko de ke do alam ki azmaten

tu be nawa faqir sa gata chala gaya