شہر مشہور زمانہ دیکھنے آیا ہوں میں

شہر مشہور زمانہ دیکھنے آیا ہوں میں

راجدھانی تیری رعنا دیکھنے آیا ہوں میں

کیا کہوں کیسے کہوں کیا دیکھنے آیا ہوں میں

دیدنی ہر اک نظارہ دیکھنے آیا ہوں میں

سر زمین پدمنی گہوارۂ پرتاپی بھیم

رشک فردوس زمانہ دیکھنے آیا ہوں میں

خوش نما جھیلوں میں لرزاں جن کا ہے عکس جمیل

ان حسیں محلوں کا نقشہ دیکھنے آیا ہوں میں

اب بھی باقی جس زمیں پر ہے گزشتہ عظمتیں

وہ زمیں با چشم بینی دیکھنے آیا ہوں میں

سرزمیں وہ جس میں تھیں عصمت سے ارزاں زندگی

کر کے پتھر کا کلیجہ دیکھنے آیا ہوں میں

جس کی خاطر پی گئے جام شہادت سورما

راجپوتوں کا وہ کعبہ دیکھنے آیا ہوں میں

جس سے باقی آج تک ہے آن راجستھان کی

وہ جمال حسن آرا دیکھنے آیا ہوں میں

سرزمیں رنگی ہے جن کی خوں سے ہلدی گھاٹ کی

ان کی امیدوں کی دنیاں دیکھنے آیا ہوں میں

اس کی مٹی میں ہوا میں آب میں کہسار میں

شان خودداری کا جلوہ دیکھنے آیا ہوں میں

تھی فضا مخمور جن سے اپنے بچپن کی حبیبؔ

ان حسیں خوابوں کی دنیا دیکھنے آیا ہوں میں

shahr mashhur-e-zamana dekhne aya hun main

rajdhani teri raana dekhne aya hun main

kya kahun kaise kahun kya dekhne aya hun main

didani har ik nazara dekhne aya hun main

sar zamin-e-padmani gahwara-e-partapi bhim

rashk-e-firdaus-e-zamana dekhne aya hun main

khush numa jhilon mein larzan jin ka hai aks-e-jamil

un hasin mahlon ka naqsha dekhne aya hun main

ab bhi baqi jis zamin par hai guzishta azmaten

wo zamin ba chashm bini dekhne aya hun main

sarzamin wo jis mein thin ismat se arzan zindagi

kar ke patthar ka kaleja dekhne aya hun main

jis ki khatir pi gae jam-e-shahadat surma

rajputon ka wo kaaba dekhne aya hun main

jis se baqi aj tak hai an rajisthan ki

wo jamal-e-husn ara dekhne aya hun main

sarzamin rangi hai jin ki khun se haldi ghat ki

un ki ummidon ki daniyan dekhne aya hun main

us ki mitti mein hawa mein ab mein kohsar mein

shan-e-khuddari ka jalwa dekhne aya hun main

thi faza makhmur jin se apne bachpan ki habib

un hasin khwabon ki duniya dekhne aya hun main