چمن میں ناز سے اٹھکھیلیاں کرتی بہار آئی

چمن میں ناز سے اٹھکھیلیاں کرتی بہار آئی

گلوں کا پیرہن پہنے وہ جان انتظار آئی

چمن والے سبھی فرط مسرت سے پکار اٹھے

بہار آئی بہار آئی بہار آئی بہار آئی

کہیں کلیوں کو چھیڑا ہے کہیں پھولوں کو چوما ہے

گلے مل مل کے پتوں سے وہ یوں روٹھی بہار آئی

نصیبہ جاگ اٹھا پھر سبھی اہل گلستاں کا

دلوں کا داغ دھو دھو کر وہ بار غم اتار آئی

نئی پھر زندگی آئی نیا دل میں سرور آیا

نئے سپنے نئے ارماں نئی آشا ابھار آئی

کھلا ہے میکدے کا در اور اذن عام ہے سب کو

وہاں پر آج رندوں کی قطار اندر قطار آئی

گئے گلشن پہ غیروں کے تو موج رنگ و بو بن کر

ہر اک گلشن سے ہم کو بھی ندائے خوش گوار آئی

نگاہ بد سے دیکھا ہے کسی نے گر گلستاں کو

تو گلچی کی ہر اک سازش ہمیں کو سازگار آئی

جنہوں نے اس چمن کو خون اور اشکوں سے سینچا تھا

بہار آئی تو یاد ان کی ہم کو بار بار آئی

نہ مالی ہو کبھی غافل نہ ان بن اہل گلشن میں

تبھی سمجھیں گے ہم یاروں حقیقت میں بہار آئی

صدا اپنے چمن میں دور دورہ ہو بہاروں کا

حبیبؔ اپنی زباں پر یہ دعا بے اختیار آئی

chaman mein naz se athkheliyan karti bahar ai

gulon ka pairahan pahne wo jan-e-intizar ai

chaman wale sabhi fart-e-masarrat se pukar uthe

bahar ai bahar ai bahar ai bahar ai

kahin kaliyon ko chhera hai kahin phulon ko chuma hai

gale mil mil ke patton se wo yun ruthi bahar ai

nasiba jag utha phir sabhi ahl-e-gulistan ka

dilon ka dagh dho dho kar wo bar-e-gham utar ai

nai phir zindagi ai naya dil mein surur aya

nae sapne nae arman nai asha ubhar ai

khula hai maikade ka dar aur izn-e-am hai sab ko

wahan par aj rindon ki qatar andar qatar ai

gae gulshan pe ghairon ke to mauj-e-rang-o-bu ban kar

har ik gulshan se ham ko bhi nadae khush gawar ai

nigah-e-bad se dekha hai kisi ne gar gulistan ko

tu gulchi ki har ik sazish hamen ko sazgar ai

jinhon ne is chaman ko khun aur ashkon se sincha tha

bahar ai to yad un ki ham ko bar bar ai

na mali ho kabhi ghafil na an ban ahl-e-gulshan mein

tabhi samjhenge ham yaron haqiqat mein bahar ai

sada apne chaman mein dur daura ho baharon ka

habib apni zaban par ye dua be ikhtiyar ai