جہاں میں غم بھی ہے روشن تریں ستاروں میں

جہاں میں غم بھی ہے روشن تریں ستاروں میں

دکھاتا راہ ہے ظلمت کے خارزاروں میں

نہیں سرود میں چنگ و رباب میں بھی نہیں

وہ ایک لے کہ ہے ٹوٹے دلوں کے تاروں میں

خزاں کی شوکت و عظمت ہے ان پہ سب ظاہر

جو ڈھونڈتے اسے پھرتے رہے بہاروں میں

خوشی سے حسن نکھرتا ہے ظاہری لیکن

جمیل روحوں کو پاؤ گے غم کے ماروں میں

بغیر درد نہیں ہے کبھی ظہور حیات

جگر کا خون ابھرتا ہے شاہکاروں میں

مکیں حرم کے مصیبت کو ان کی کیا جانیں

جو خاک چھانتے ہیں اجنبی دیاروں میں

پسند آیا جو ٹوٹے دلوں کا عز و نیاز

تو بس گیا ہے خدا بھی گنہ گاروں میں

کبھی تو دیکھتے تم آ کے غم نصیبوں کو

حسین داغ ہے سینے کے لالہ زاروں میں

jahan mein gham bhi hai raushan tiren sitaron mein

dikhata rah hai zulmat ke kharzaron mein

nahin surud mein chang-o-rabab mein bhi nahin

wo ek le ke hai tute dilon ke taron mein

khizan ki shaukat-o-azmat hai un pe sab zahir

jo dhundte use phirte rahe baharon mein

khushi se husn nikharta hai zahiri lekin

jamil ruhon ko paoge gham ke maron mein

baghair dard nahin hai kabhi zuhur-e-hayat

jigar ka khun ubharta hai shahkaron mein

makin haram ke musibat ko un ki kya janen

jo khak chhante hain ajnabi dayaron mein

pasand aya jo tute dilon ka izz-o-niyaz

to bas gaya hai khuda bhi gunah garon mein

kabhi to dekhte tum a ke gham nasibon ko

hasin dagh hai sine ke lala zaron mein