میری سوئی ہوئی قسمت کو جگانے آ جا

میری سوئی ہوئی قسمت کو جگانے آ جا

آ جا آ جا مری بگڑی کو بنانے آ جا

کھو گیا عقل کی راہوں میں مرا عہد شباب

از سر نو مجھے دیوانہ بنانے آ جا

سرد لاشہ ہے مرا عشق سے خالی سینہ

اک نیا سوز نئی آگ لگانے آ جا

باغ میں پھول ہے پژمردہ و پامال سبھی

ہر روش پر تو نئے پھول کھلانے آ جا

کان اب پک گئے سن سن کے پرانے نغمے

ان سنے گیت نئے راگ سنانے آ جا

سخت ہموار ہے یکساں ہے مری راہ حیات

کوئی صحرا کوئی ویرانہ دکھانے آ جا

زاہد خشک رہا خوف گنہ سے لیکن

اب محبت کا گنہ گار بنانے آ جا

کیف بن جا مرے دل کا میری نظروں کا سرور

مثل بادہ مری رگ رگ میں سمانے آ جا

منزل زیست کدھر ہے نہیں معلوم حبیبؔ

تھام کر ہاتھ مجھے راہ دکھانے آ جا

meri soi hui qismat ko jagane a ja

a ja a ja miri bigri ko banane a ja

kho gaya aql ki rahon mein mira ahd-e-shabab

az sar-e-nau mujhe diwana banane a ja

sard lasha hai mira ishq se khali sina

ik naya soz nai ag lagane a ja

bagh mein phul hai pazhmurda-o-pamal sabhi

har rawish par to nae phul khilane a ja

kan ab pak gae sun sun ke purane naghme

an sune git nae rag sunane a ja

sakht hamwar hai yaksan hai miri rah-e-hayat

koi sahra koi wirana dikhane a ja

zahid-e-khushk raha khauf-e-gunah se lekin

ab mohabbat ka gunah gar banane a ja

kaif ban ja mire dil ka meri nazron ka surur

misl-e-bada miri rag rag mein samane a ja

manzil-e-zist kidhar hai nahin maalum habib

tham kar hath mujhe rah dikhane a ja