کیوں نہ اپنی ہستیٔ ناشاد کا شکوا کروں

کیوں نہ اپنی ہستیٔ ناشاد کا شکوا کروں

رنج و غم گھیرے ہوں جب مجھ کو تو میں بھی کیا کروں

میری قسمت میں لکھی ہے خار صحرا کی خلش

کس توقع پر تمنائے گل رعنا کروں

صبر کا پھل لوگ کہتے ہیں ملے گا ایک دن

آہ کب تک انتظار وعدۂ فردا کروں

کون کرتا ہے مداوا خاطر ناشاد کا

اپنی محرومی کا کس کے سامنے چرچا کروں

دل کے داغوں کو سمجھ لوں کس طرح گلہائے تر

غم سے کیسے ساز و سامان خوشی پیدا کروں

گردش دوراں سے کہہ دو اس پہ میں راضی نہیں

چند ساعت مسکرا کر عمر بھر رویا کروں

میں ازل سے درمیان رنج و راحت ہوں اسیر

غم کو اپناؤں کہ راحت کو کروں تو کیا کروں

ایک مدت سے پریشاں خاطر ناشاد ہے

سوچتا ہوں پارہ ہائے دل کو پھر یکجا کروں

ایک حالت پر کبھی رہتا نہیں مجھ کو قرار

ہر سکوں کے بعد یہ ہے آرزو تڑپا کروں

وہ سکون مستقل ہے یہ ہے پیہم اضطراب

زندگانی کا گلہ یا موت کا شکوا کروں

kyun na apni hasti-e-nashad ka shakwa karun

ranj-o-gham ghere hun jab mujh ko to main bhi kya karun

meri qismat mein likhi hai khar-e-sahra ki khalish

kis tawaqqo par tamanna-e-gul-e-raana karun

sabr ka phal log kahte hain milega ek din

ah kab tak intizar-e-waada-e-farda karun

kaun karta hai mudawa khatir-e-nashad ka

apni mahrumi ka kis ke samne charcha karun

dil ke daghon ko samajh lun kis tarah gulhae tar

gham se kaise saz-o-saman-e-khushi paida karun

gardish-e-dauran se kah do us pe main razi nahin

chand saat muskura kar umr bhar roya karun

main azal se darmiyan-e-ranj-o-rahat hun asir

gham ko apnaun ke rahat ko karun to kya karun

ek muddat se pareshan khatir-e-nashad hai

sochta hun para ha-e-dil ko phir yakja karun

ek halat par kabhi rahta nahin mujh ko qarar

har sakun ke baad ye hai arzu tarpa karun

wo sukun-e-mustaqil hai ye hai paiham iztirab

zindagani ka gila ya maut ka shakwa karun