مختصر کمرے کی

مختصر کمرے کی

ایک چھوٹی سی مغموم کھڑکی

کبھی دیکھتی ہے جو باہر کی دنیا

اداسی بہت بڑھ جاتی ہے اس کی

مگر سامنے کے ہرے لان کے پھول

چمپا چمیلی گلاب اور بیلا کی پوشاک

پہنے ہوئے مسکراتے ہوئے

رنگ و خوشبو کے لہجے میں اس کو

سناتے ہیں معصوم لمحوں کا قصہ

ہتھیلی پہ پھر انہی معصوم لمحوں کی

تحریر کرتی ہے دل کش ہنسی

ایک چہکار کوئل کی

اور جب محبت کی انگلی نزاکت سے تھامے

خراماں خراماں

انوکھا سا اک پھول اس لان پر

میرؔ کے شعر کہ پنکھڑی چننے لگتا ہے

تب وقت کے قہقہوں کا

بہت خوشنما سلسلہ

ٹھہر جاتا ہے

اس مختصر کمرے کی

چھوٹی سی کھڑکی میں

mukhtasar kamre ki

ek chhoti si maghmum khirki

kabhi dekhti hai jo bahar ki duniya

udasi bahut barh jati hai us ki

magar samne ke hare lan ke phul

champa chamili gulab aur bela ki poshak

pahne hue muskurate hue

rang-o-khushbu ke lahje mein us ko

sunate hain maasum lamhon ka qissa

hatheli pe phir unhi maasum lamhon ki

tahrir karti hai dil kash hansi

ek chahkar koyal ki

aur jab mohabbat ki ungli nazakat se thame

khiraman khiraman

anokha sa ik phul is lan par

mir ke sher ke pankhuri chunne lagta hai

tab waqt ke qahqahon ka

bahut khushnuma silsila

thahar jata hai

is mukhtasar kamre ki

chhoti si khirki mein