لگے گا اجنبی اب کیوں نہ شہر بھر مجھ کو

لگے گا اجنبی اب کیوں نہ شہر بھر مجھ کو

بچا گیا ہے نظر تو بھی دیکھ کر مجھ کو

میں گھوم پھر کے اسی سمت آ نکلتا ہوں

جکڑ رہی ہے ترے گھر کی رہ گزر مجھ کو

جھلس رہا ہے بدن زیر سایۂ دیوار

بلا رہا ہے کوئی دشت بے شجر مجھ کو

میں سنگ دل ہوں تجھے بھولتا ہی جاتا ہوں

میں ہنس رہا ہوں تو مل کے اداس کر مجھ کو

میں دیکھتا ہی رہوں گا تجھے کنارے سے

تو ڈھونڈھتا ہی رہے گا بھنور بھنور مجھ کو

بنی ہیں تند ہواؤں کی زرد دیواریں

اڑا رہا ہے مگر شعلۂ سفر مجھ کو

بنا دیا ہے نڈر ضدی خواہشوں نے نسیمؔ

خود اعتماد نہ تھا اپنے آپ پر مجھ کو

lagega ajnabi ab kyun na shahr bhar mujh ko

bacha gaya hai nazar tu bhi dekh kar mujh ko

main ghum phir ke usi samt a nikalta hun

jakar rahi hai tire ghar ki rah guzar mujh ko

jhulas raha hai badan zer-e-saya-e-diwar

bala raha hai koi dasht-e-be shajar mujh ko

main sang dil hun tujhe bhulta hi jata hun

main hans raha hun to mil ke udas kar mujh ko

main dekhta hi rahunga tujhe kinare se

tu dhundhta hi rahega bhanwar bhanwar mujh ko

bani hain tund hawaon ki zard diwaren

ura raha hai magar shola-e-safar mujh ko

bana diya hai nidar ziddi khwahishon ne nasim

khud etimad na tha apne ap par mujh ko