ہزاروں سال بیتے

ہزاروں سال بیتے

مری زرخیز دھرتی کے سنگھاسن پر

براجے دیوتاؤں کے سراپے سانولے تھے

مگر اس وقت بھی کچھ حسن کا معیار اونچا تھا

ہمالہ کی حسیں بیٹی انہیں بھائی

برندابن کی دھرتی پر

تھرکتی ناچتی رادھا

بسی تھی کرشن کے دل میں

انہیں بھی حسن کی من موہنی مورت پسند آئی

مگر ان کو خدا ہوتے ہوئے بھی یہ خبر کب تھی

کہ ان کی آنے والی نسل پر ان کا سراپا

بہت گہرا اثر ہے چھوڑنے والا

ہزاروں سال بیتے

مگر اب بھی ہماری سانولی رنگت

ترا وردان ہو گویا

ہمارا ہم سفر بھی کسی پارو

کسی رادھا کا اندھا خواب

آنکھوں میں بسائے

لیے کشکول ہاتھوں میں

پھرے بستی کی گلیوں میں

ہم اب کس زعم میں پوجا کی تھالی میں

دئے رکھ کر

تری چوکھٹ پہ آئیں

سر جھکائیں

اتاریں آرتی تیری

ہمارے بخت پر تیرا یہ شیامل رنگ

اک آسیب کی صورت مسلط ہے

ہم اب تو ڈر کے مارے

آئنوں سے منہ چھپائے پھر رہے ہیں

hazaron sal bite

miri zarkhez dharti ke singhasan par

biraje dewtaon ke sarape sanwale the

magar is waqt bhi kuchh husn ka meyar uncha tha

himala ki hasin beti unhen bhai

barnadaban ki dharti par

thirakti nachti radha

basi thi krishn ke dil mein

unhen bhi husn ki man mohni murat pasand ai

magar un ko khuda hote hue bhi ye khabar kab thi

ke un ki ane wali nasl par un ka sarapa

bahut gahra asar hai chhorne wala

hazaron sal bite

magar ab bhi hamari sanwli rangat

tira wirdan ho goya

hamara ham safar bhi kisi paro

kisi radha ka andha khwab

ankhon mein basae

liye kashkol hathon mein

phire basti ki galiyon mein

ham ab kis zaam mein puja ki thali mein

diye rakh kar

tiri chaukhat pe aen

sar jhukaen

utaren arti teri

hamare bakht par tera ye shayamal rang

ik aseb ki surat musallat hai

ham ab to dar ke mare

ainon se munh chhupae phir rahe hain