ہمیں خانوں میں مت بانٹو

ہمیں خانوں میں مت بانٹو

کہ ہم تو روشنی ٹھہرے

کسی دہلیز پر جلتے ہوئے شب بھر

کسی کا راستہ تکتے

چراغوں سے بھی آگے ہے جہاں اپنا

اجالوں کی کمک لے کر

اندھیرے کی صفوں کو چیر جاتے ہیں

یہ جگنو چاند اور تارے

ہماری صورتیں جیسے

ہمیں خانوں میں مت بانٹو

ہوا ہیں ہم

بھلا دیوار و در میں قید کیا ہوں گے

سنہری صبح ڈھلتی شام کی راحت ہمیں سے ہے

ہمیں میزان پر رکھنے سے پہلے

تولنے سے قبل اتنا سوچ لینا ہے

ہمارا بوجھ تیری بند مٹھی میں دبی رسی

اٹھائے گی بھلا کیسے

کہ ہم تو شش جہت میں

جس طرف نظریں اٹھاؤ

دیکھ لو پھیلی ہوئی بکھری ہوئی ہم کو

کہ ہم تو زندگی ہیں

hamen khanon mein mat banto

ke ham to raushni thahre

kisi dahliz par jalte hue shab bhar

kisi ka rasta takte

charaghon se bhi age hai jahan apna

ujalon ki kumak le kar

andhere ki safon ko chir jate hain

ye jugnu chand aur tare

hamari suraten jaise

hamen khanon mein mat banto

hawa hain ham

bhala diwar-o-dar mein qaid kya honge

sunahri subh dhalti sham ki rahat hamen se hai

hamen mizan par rakhne se pahle

tolne se qabl itna soch lena hai

hamara bojh teri band mutthi mein dabi rassi

uthaegi bhala kaise

ke ham to shash jihat mein

jis taraf nazren uthao

dekh lo phaili hui bikhri hui ham ko

ke ham to zindagi hain