Arooz is now on the App Store, for iPhone and iPad. Download →

All poetry

لکھانے نام سچے عاشقوں میں جب بھی ہم نکلے

Ghaus Khah makhah Hyderabadi (1929–2017)

لکھانے نام سچے عاشقوں میں جب بھی ہم نکلے

ارادوں میں ہمارے جانے کتنے پیچ و خم نکلے

یہ سوچا تھا کہ گھر سے بھاگ کر شادی رچائیں گے

مگر جب وقت آیا تو نہ وہ نکلے نہ ہم نکلے

سنا ہے راستے ہی میں پولس نے دھر لیا ان کو

ہمارے دل پہ جب کرنے کو وہ مشق ستم نکلے

دماغ ان کا جو دیکھا اور دل کی بھی تلاشی لی

کئی پستول نخروں کے کئی غصے کے بم نکلے

جھگڑ کر جب کہا بیگم نے ہم سے گھر سے جانے کو

بہت بے آبرو ہو کر خود اپنے گھر سے ہم نکلے

جو ہوتا اور کوئی تو نکل جاتا وہ غصے میں

مگر ہم بادل نا خواستہ با چشم نم نکلے

ہمارا حوصلہ تو دیکھیے کہ لنچ کھاتے ہی

نہیں لوٹیں گے اب ہم شام تک کھا کر قسم نکلے

مگر جب شام سے پہلے ہی بھوکے پیٹ لوٹ آئے

وہ طعنہ دے کے بولیں آپ تو ثابت قدم نکلے

زمانے کے ستائے ہیں جو لوگوں کو ہنساتے ہیں

کریدا جب بھی دل ان کا ہزاروں غم ہی غم نکلے

کرم کی بات ہے میرے گنہ اعمال نامہ میں

یہ سوچا تھا بہت ہوں گے مگر دیکھا تو کم نکلے

بڑھاپے میں بھی میری ؔخواہ مخواہ ہے آخری خواہش

ہوں گھر میں بیویاں اتنی کہ ہر بیوی پہ دم نکلے