کسی کے حق میں سہی فیصلہ ہوا تو ہے

کسی کے حق میں سہی فیصلہ ہوا تو ہے

مرا نہیں وہ کسی شخص کا ہوا تو ہے

یہی بہت ہے کہ اس نے مجھے بھی مس تو کیا

یہ لمس مجھ میں ابھی تک رچا ہوا تو ہے

اسے میں کھل کے کبھی یاد کر تو سکتا ہوں

مجھے خوشی ہے وہ مجھ سے جدا ہوا تو ہے

سکوت شب ہی سہی میرا ہم سفر لیکن

مرے سوا بھی کوئی جاگتا ہوا تو ہے

گھٹن کہ بڑھتی چلی جا رہی ہے اندر کی

تمام خوش ہیں کہ موسم کھلا ہوا تو ہے

یہ اور بات کہ میں زندہ رہ گیا ہوں نسیمؔ

ہر اک ستم مری جاں پر روا ہوا تو ہے

kisi ke haq mein sahi faisla hua to hai

mira nahin wo kisi shakhs ka hua to hai

yahi bahut hai ke us ne mujhe bhi mis to kiya

ye lams mujh mein abhi tak racha hua to hai

use main khul ke kabhi yad kar to sakta hun

mujhe khushi hai wo mujh se juda hua to hai

sukut-e-shab hi sahi mera ham safar lekin

mire siwa bhi koi jagta hua to hai

ghutan ke barhti chali ja rahi hai andar ki

tamam khush hain ke mausam khula hua to hai

ye aur bat ke main zinda rah gaya hun nasim

har ik sitam miri jan par rawa hua to hai