کسی طرح تو اسے مار دوں جو باہر ہے

کسی طرح تو اسے مار دوں جو باہر ہے

وہ شخص کیسے مرے گا جو میرے اندر ہے

سکھا دیا مجھے آداب گفتگو تو نے

مرے لئے تو ترا حسن ہی گرامر ہے

اب اس کے سامنے سچ بولنے نہ لگ جانا

وہ میرے بارے میں پوچھے تو کہنا بہتر ہے

لو اب تو بیٹھے بٹھائے ہی دید ہوتی ہے

وبا کا دور ہے سو آج کل وہ گھر پر ہے

اب ایسے میں مرے دل سے دعا ہی نکلے گی

وہ سرخ جوڑے میں جو آج بن سنور کر ہے

پھر اشک ہو گئے بے مول جب یہ اس نے کہا

نکال دوں میں تری آنکھ میں جو کنکر ہے

ہر ایک راہ سے گزرا ہوں بے نیازانہ

عطاؔ غرض کا پجاری نہیں قلندر ہے

kisi tarah to use mar dun jo bahar hai

wo shakhs kaise mire ga jo mere andar hai

sikha diya mujhe adab-e-guftugu tu ne

mire liye to tira husn hi giramar hai

ab us ke samne sach bolne na lag jana

wo mere bare mein puchhe to kahna behtar hai

lo ab to baithe bithae hi did hoti hai

waba ka daur hai so aj kal wo ghar par hai

ab aise mein mire dil se dua hi niklegi

wo surkh jore mein jo aj ban sanwar kar hai

phir ashk ho gae be mol jab ye us ne kaha

nikal dun main tiri ankh mein jo kankar hai

har ek rah se guzra hun be niyazana

ata gharaz ka pujari nahin qalandar hai