نام بھی جس کا زباں پر تھا دعاؤں کی طرح

نام بھی جس کا زباں پر تھا دعاؤں کی طرح

وہ مجھے ملتا رہا نا آشناؤں کی طرح

آ کہ تیرے منتظر ہیں آج بھی دیوار و در

گونجتا ہے گھر میں سناٹا صداؤں کی طرح

وہ شجر جلتا رہا خود کس کڑکتی دھوپ میں

جس کا سایہ تھا مرے سر پر گھٹاؤں کی طرح

جھک رہے تھے باغ کے سب پھول اس کے سامنے

گھاس پر بیٹھا تھا وہ فرماں رواؤں کی طرح

میں بھلا کیسے اسے اک اجنبی کہہ دوں نسیمؔ

جس نے دیکھا تھا پلٹ کر آشناؤں کی طرح

nam bhi jis ka zaban par tha duaon ki tarah

wo mujhe milta raha na ashnaon ki tarah

a ke tere muntazir hain aj bhi diwar-o-dar

gunjta hai ghar mein sannata sadaon ki tarah

wo shajar jalta raha khud kis karakti dhup mein

jis ka saya tha mire sar par ghataon ki tarah

jhuk rahe the bagh ke sab phul us ke samne

ghas par baitha tha wo farman rawaon ki tarah

main bhala kaise use ik ajnabi kah dun nasim

jis ne dekha tha palat kar ashnaon ki tarah