سب ستارے چاند سورج پھول پھل گئے

سب ستارے چاند سورج پھول پھل گئے

کب کہاں اور کون کے سب سلسلے اب ختم ہیں

وقت پر موت آ گئی موسم بدل گئے

وقت کا لمحۂ فانی لے گیا سب روشنی اور رنگ و بو

اب نہ پیالہ ہے نہ پانی

ایک کورا آسماں ہے

بے در و دیوار روزن اور بے نام و نشاں

شکل اور شیشے کی آرائش کا منظر بھی نہیں

نور کی نظریں بھی پتھر ہو گئیں

اب رہو تم منتظر

خاک و خوں کی چاشنی میں کون اب لائے گا وصل و ہجر کے موسم یہاں

اب وہ گم گشتہ خزینوں کی خبر

پھول کی پتی میں لرزاں پھر نہ دیکھو گے کبھی

یہ خیال و خواب کی خاکستری خبروں کے دن

اور خوابیدہ نشے میں لوٹتی راتوں کی بتیاں گل ہوئیں

خاک داں سب جل بجھے

خون کی ہولی کے کھیل

تیری میری ضد کے سارے میل جول

وصل کی سب قربتیں اور ہجر کے سب فاصلے

سب صدائیں اور صدیاں موسموں کے قافلے

ڈھل ڈھلا کر رنگ کی آمیزشوں کے سائے میں

تیرے میرے سر سے سارے وار کر

چاندنی اور دھوپ کے ان نقرئی سکوں کا روپ

لے اڑے ہیں کاغذی پیراہنوں کے دوش پر

تیری میری کلفتوں اور الفتوں کی داستاں

قافلوں کا وقت اب باقی نہیں

چھوڑ دو پیمائش سود و زیاں

دور اب ریگ رواں کا ختم ہے

وقت کا وقفہ نیا آئے گا بھی

پھر بساط دل بچھائیں گے نئی

پھر کھلے گا موسم گل بھی نیا

باندھ رکھ رخت سفر

اے ہم سفر

میں وہی مشت غبار رہگزر

ہوں منتظر

sab sitare chand suraj phul phal gae

kab kahan aur kaun ke sab silsile ab khatm hain

waqt par maut a gai mausam badal gae

waqt ka lamha-e-fani le gaya sab raushni aur rang-o-bu

ab na pyala hai na pani

ek kora asman hai

be dar-o-diwar rauzan aur be nam-o-nishan

shakl aur shishe ki araish ka manzar bhi nahin

nur ki nazren bhi patthar ho gain

ab raho tum muntazir

khak-o-khun ki chashni mein kaun ab laega wasl-o-hijr ke mausam yahan

ab wo gum gashta khazinon ki khabar

phul ki patti mein larzan phir na dekhoge kabhi

ye khayal-o-khwab ki khakistari khabron ke din

aur khwabida nashe mein lautti raton ki battiyan gul huin

khak dan sab jal bujhe

khun ki holi ke khel

teri meri zid ke sare mel jol

wasl ki sab qurbaten aur hijr ke sab fasle

sab sadaen aur sadiyan mausamon ke qafile

dhal dhala kar rang ki amezishon ke sae mein

tere mere sar se sare war kar

chandni aur dhup ke un nuqrai sukun ka rup

le ure hain kaghzi pairahanon ke dosh par

teri meri kulfaton aur ulfaton ki dastan

qafilon ka waqt ab baqi nahin

chhor do paimaish sud-o-ziyan

dur ab reg-e-rawan ka khatm hai

waqt ka waqfa naya aega bhi

phir bisat-e-dil bichhaenge nai

phir khulega mausam-e-gul bhi naya

bandh rakh rakht-e-safar

ai ham safar

main wahi musht-e-ghubar rahguzar

hun muntazir