لوگ کہتے ہیں مورکھ

لوگ کہتے ہیں مورکھ

ملاقات کا سلسلہ ختم ہے

مگر اپنے جینے کا مقصد ملاقات ہے

تم ملو گے

کبھی ایسا رستہ بھی ہم کو سمجھاؤ

جہاں تم بھی آؤ

بہت سانس جھونکا بہت لفظ پھونکے

شب و روز کے ان گنت زرد پتوں کے

ڈھیروں سے ڈھانپا کیے

جسم اپنا

لبادوں کی صورت بہت ہم نے پہنا اتارا

بہت منزلیں چھوڑ دیں

اس لیے ہم نہ ٹھہرے

کہ تیری طرف ہم روانہ رہیں

مگر اپنی ہجرت کی منزل کبھی آئے گی بھی

کہ رسیا ہے تو بھی

فقط ہجر کی داستاں کا

اساطیر کی شکل و صورت میں

دہرا کے ہم کو سناتا رہے گا

وہی نغمۂ سوز و ساز

سلسلہ ہائے دور و دراز

رات کے نو بجے تھے

ترے در پہ سر رکھ کے سجدے میں رویا کہ سویا

تو صبح کے نو بج گئے

رات کو دن کے دامن میں دھویا

مٹائی سیاہی بہت قلب و جاں کی

تری روح کے سانس کی ہے قسم

جو تو نے کبھی مجھ میں پھونکی

اسی نغمۂ نور سے

اپنی ہستی کے ذرے پرونے کی کوشش بہت کی

مگر خاک میں بھی تو آلودگی ہے

وجود اپنے زنداں سے پائے گا کیسے نجات

کسی طور ممکن بھی ہے

کہ خرد خون اور خاک

خواہش خیال اور خواب

ملا دیں مجھے میری مٹی کی خوشبو سے

خود کشی کی کئی صورتوں سے گزرنا پڑا ہے

خودی کو

سفر کر کے دیکھا کئی عالموں میں

ستاروں سے آگے

جہانوں سے آگے

خودی کی خدائی فقط خودکشی ہے

تری آرزو کی وہی تشنگی ہے

یہی تشنگی تیرے در سے

کہیں سر اٹھا دے نہ میرا

دعا دے

اگر میں ہوں تیرا

اگر تو ہے میرا

log kahte hain murakh

mulaqat ka silsila khatm hai

magar apne jine ka maqsad mulaqat hai

tum miloge

kabhi aisa rasta bhi ham ko samjhao

jahan tum bhi ao

bahut sans jhonka bahut lafz phunke

shab-o-roz ke an ginat zard patton ke

dheron se dhanpa kiye

jism apna

labadon ki surat bahut ham ne pahna utara

bahut manzilen chhor den

is liye ham na thahre

ke teri taraf ham rawana rahen

magar apni hijrat ki manzil kabhi aegi bhi

ke rasiya hai tu bhi

faqat hijr ki dastan ka

asatir ki shakl-o-surat mein

dohra ke ham ko sunata rahega

wahi naghma-e-soz-o-saz

silsila ha-e-dur-o-daraz

rat ke nau baje the

tire dar pe sar rakh ke sajde mein roya ke soya

tu subh ke nau baj gae

rat ko din ke daman mein dhoya

mitai siyahi bahut qalb-o-jan ki

tiri ruh ke sans ki hai qasam

jo tu ne kabhi mujh mein phunki

isi naghma-e-nur se

apni hasti ke zarre pirone ki koshish bahut ki

magar khak mein bhi to aludagi hai

wajud apne zindan se paega kaise najat

kisi taur mumkin bhi hai

ke khirad khun aur khak

khwahish khayal aur khwab

mila den mujhe meri mitti ki khushbu se

khud kashi ki kai suraton se guzarna para hai

khudi ko

safar kar ke dekha kai alamon mein

sitaron se age

jahanon se age

khudi ki khudai faqat khudkushi hai

tiri arzu ki wahi tishnagi hai

yahi tishnagi tere dar se

kahin sar utha de na mera

dua de

agar main hun tera

agar to hai mera