جانی — Ghalib Ahmad

جانی

آج کی شب

کچھ ایسی نیند سلا دو مجھ کو

کہ کل صبح

جب آنکھ کھلے تو موت کی سرحد پار ہوئی ہو

اک ایسا جام پلا دو مجھ کو

کہ کل صبح

جب آنکھ کھلے

تو میرا نفس ترے شیشے سے زیادہ صاف ہوا ہو

کچھ اس طرح سے رلا دو مجھ کو

کہ کل صبح

جب آنکھ کھلے تو

نور کا پہلا قطرہ آنکھ سے ہو کر سارے دل میں پھیل گیا ہو

آج کی شب

سونے کی تمنا کر لینے دو

کل صبح

جب آنکھ کھلے تو

سو کر جاگنے والے سب جذبوں سے دل آزاد ہوا ہو

جانی

کبھی تو اپنی من مانی بھی کر لینے دو

کبھی تو اپنی گود میں سو کر مر لینے دو