کون آیا ہے

کون آیا ہے

یہ کس نے پھونک کر رکھے قدم

دہلیز پر چپ چاپ چوروں کی طرح

رات کی تاریکیوں میں سرسراہٹ سانپ کی

سانس کو سینے کے اندر روک لو

سن نہ لے قدموں کی آہٹ

دل کی دھڑکن کو کہو چپ سادھ لے

دل کا در وا تو نہ تھا

پر وہ تو دروازے سے اندر آ گیا

اس نے دستک بھی نہ دی

ایک سائے کی طرح ہے ساتھ ساتھ

کیا کریں کس کو بلائیں

کیا کہیں یہ کون ہے

چپ چاپ بے آواز

گم صم سامنے بیٹھا ہوا

یوں تو سب کچھ ہے

اگر سوچو تو یہ کچھ بھی نہیں

وہم و گماں

کون اب ڈھونڈے اسے

وہ تو آ کر رات کی تاریکیوں میں

اس طرح گھل مل گیا

جیسے اپنا جسم ہو اس کا لباس

ہم نے دیکھا ہے اسے

جو خود سے بھی روپوش ہے

وہ ہماری روح کی گردش میں ہے

اور ہمارے جسم سے سیراب ہے

اب اگر تم سو سکو تو سو رہو

اب وہ جائے گا کہاں

اب وہ شاید پھر نہ آئے گا کبھی

kaun aya hai

ye kis ne phunk kar rakhe qadam

dahliz par chup chap choron ki tarah

rat ki tarikiyon mein sarsarahat sanp ki

sans ko sine ke andar rok lo

sun na le qadmon ki ahat

dil ki dharkan ko kaho chup sadh le

dil ka dar wa to na tha

par wo to darwaze se andar a gaya

us ne dastak bhi na di

ek sae ki tarah hai sath sath

kya karen kis ko balaen

kya kahen ye kaun hai

chup chap be awaz

gum sum samne baitha hua

yun to sab kuchh hai

agar socho to ye kuchh bhi nahin

wahm-o-guman

kaun ab dhunde use

wo to a kar rat ki tarikiyon mein

is tarah ghul mil gaya

jaise apna jism ho us ka libas

ham ne dekha hai use

jo khud se bhi ruposh hai

wo hamari ruh ki gardish mein hai

aur hamare jism se sairab hai

ab agar tum so sako to so raho

ab wo jaega kahan

ab wo shayad phir na aega kabhi