درختوں سے پتے تو ہر سال گرتے ہیں

درختوں سے پتے تو ہر سال گرتے ہیں

مٹی میں ملنے کی خواہش لیے

مگر ان کو گن گن کے رکھتا ہے کون

سفر کی تھکن سے سراسیمہ پتا

جو گرتا ہے لمحے کی دیوار کرکے عبور

بہت دور سے آ کے لیتا ہے

مٹی کی خوشبو کی خوشیاں

مگر زرد رنگوں کے زیور سے آراستہ

یہ خزاں کی دلہن

جس کی قسمت کے تارے

شب و روز گرتے ہیں

دھرتی کی آغوش پر

ہیں یہ کس کے اشارے

انہی زرد رنگوں کی خوشبو میں

شاید نئی خواہشوں کے افق ہیں

نئے چاند تارے

darakhton se patte to har sal girte hain

mitti mein milne ki khwahish liye

magar un ko gin gin ke rakhta hai kaun

safar ki thakan se sarasima pata

jo girta hai lamhe ki diwar karke ubur

bahut dur se a ke leta hai

mitti ki khushbu ki khushiyan

magar zard rangon ke zewar se arasta

ye khizan ki dulhan

jis ki qismat ke tare

shab-o-roz girte hain

dharti ki aghosh par

hain ye kis ke ishare

unhi zard rangon ki khushbu mein

shayad nai khwahishon ke ufuq hain

nae chand tare