جھگیوں کا حق دبانا آ گیا

جھگیوں کا حق دبانا آ گیا

کوٹھیوں کو ظلم ڈھانا آ گیا

کہہ رہی ہے مسکراہٹ کھیت کی

دھان کی بالی میں دانہ آ گیا

دودھیا خوش ہے کہ بیٹے کو بھی اب

دودھ میں پانی ملانا آ گیا

فکر کچھ تو کم ہوئی ماں باپ کی

لال کو کھانا کمانا آ گیا

وہ سبھی رونق ہوئے دربار کی

ہاں میں جن کو سر ہلانا آ گیا

سانس کی بیماریاں بڑھنے لگیں

گاؤں میں کیا کارخانہ آ گیا

چھو ہی لیں گے آسماں کو ایک دن

پاؤں دھرتی پر جمانا آ گیا

کرتے کرتے مشق مصرع پر وویکؔ

ہم کو بھی مصرع لگانا آ گیا

jhuggiyon ka haq dabana a gaya

kothiyon ko zulm dhana a gaya

kah rahi hai muskurahat khet ki

dhan ki bali mein dana a gaya

dudhiya khush hai ke bete ko bhi ab

dudh mein pani milana a gaya

fikr kuchh to kam hui man bap ki

lal ko khana kamana a gaya

wo sabhi raunaq hue darbar ki

han main jin ko sar hilana a gaya

sans ki bimariyan barhne lagen

gaon mein kya karkhana a gaya

chhu hi lenge asman ko ek din

paon dharti par jamana a gaya

karte karte mashq misra par woyak

ham ko bhi misra lagana a gaya