دوست رخصت ہو گئے

دوست رخصت ہو گئے

ان سے ملاقاتیں گئیں باتیں گئیں

شہر تھا آباد جن کے دم قدم سے

وہ ہماری چاندنی راتیں گئیں

مرنے والے مر گئے

زندہ مگر ہم بھی نہیں

وہ تو غسل آخری لے کر ہوئے پھر تازگی سے آشنا

نتھرے ستھرے اوڑھ کر اپنی سفیدی کے کفن

کافور کی خوشبو کو نتھنوں میں سمائے

سو گئے آرام سے ٹھنڈے بدن

اپنی اپنی قبر پر تکیہ کیے

وہ تھکن کی اس مسلسل سرسراہٹ سے تو اب آزاد ہیں

سانس کی زنجیر سے لٹکے ہوئے

جاگتے رہنے کی کاوش اور لگن

اس تگ و دو سے پرے آباد ہیں

اور ہم

جو اس کنارے پر کھڑے

روز و شب لہروں کا کرتے ہیں شمار

آپ بیتی روز سنتے ہیں

مگر خاموش ہیں

خامشی سے بہتا پانی

روز بہتا دیکھتے ہیں

ڈوب جانے کی مگر ہمت نہیں

کون جانے ڈوب ہی جائیں کہیں

ڈوب جاؤ یا چلے آؤ ادھر

باز آؤ اور پھر زندہ رہو

ساتواں در بھی کھلا ہے منتظر

داغ ہجرت دے گئے خوشبو کے پھول

کون اب بن کر چراغ راہ تم کو

ہاتھ سے انگلی پکڑ کر

طفل مکتب کی طرح لے کر بڑھے

اور یہ کہے

موت کا لمحہ ہماری زندگی کا آ گیا

جسم کی ٹھنڈک تو دستک دے رہی ہے

آؤ کچھ باتیں کریں

اور پھر چلیں

دوست رخصت ہو گئے

dost rukhsat ho gae

un se mulaqaten gain baten gain

shahr tha abad jin ke dam qadam se

wo hamari chandni raten gain

marne wale mar gae

zinda magar ham bhi nahin

wo to ghusl akhiri le kar hue phir tazgi se ashna

nithre suthre orh kar apni safedi ke kafan

kafur ki khushbu ko nthanon mein samae

so gae aram se thande badan

apni apni qabr par takiya kiye

wo thakan ki is musalsal sarsarahat se to ab azad hain

sans ki zanjir se latke hue

jagte rahne ki kawish aur lagan

is tag-o-do se pare abad hain

aur ham

jo us kinare par khare

roz-o-shab lahron ka karte hain shumar

ap biti roz sunte hain

magar khamosh hain

khamushi se bahta pani

roz bahta dekhte hain

dub jane ki magar himmat nahin

kaun jane dub hi jaen kahin

dub jao ya chale ao idhar

baz ao aur phir zinda raho

satwan dar bhi khula hai muntazir

dagh hijrat de gae khushbu ke phul

kaun ab ban kar charagh-e-rah tum ko

hath se ungli pakar kar

tifl-e-maktab ki tarah le kar barhe

aur ye kahe

maut ka lamha hamari zindagi ka a gaya

jism ki thandak to dastak de rahi hai

ao kuchh baten karen

aur phir chalen

dost rukhsat ho gae