رات کی آخری ٹرین تلک

رات کی آخری ٹرین تلک

گھر میں بکھری ہوئی سبھی چیزیں

ایک ایک کر کے صاف ہوتی ہیں

اور جگہ ان کی بدلی جاتی ہے

پھر کتابوں کی صاف الماری

بس کھلی رہتی ہے یوں ہی گھنٹوں

رات کی آخری ٹرین کے بعد

رکشا تانگوں کی کھڑکھڑاہٹ سے

سوتے سوتے وہ جاگ جاتی ہے

دیر تک جسم کی حرارت سے

اپنے تنہا گداز بستر کو

چند گزرے ہوئے دنوں کی بات

دھیرے دھیرے سناتی رہتی ہے

صبح ہونے سے پہلے کتنی بار

ٹھنڈے پانی سے وہ نہاتی ہے

rat ki akhiri taren talak

ghar mein bikhri hui sabhi chizen

ek ek kar ke saf hoti hain

aur jagah un ki badli jati hai

phir kitabon ki saf almari

bas khuli rahti hai yun hi ghanton

rat ki akhiri taren ke baad

raksha tangon ki kharkharahat se

sote sote wo jag jati hai

der tak jism ki hararat se

apne tanha gudaz bistar ko

chand guzre hue dinon ki bat

dhire dhire sunati rahti hai

subh hone se pahle kitni bar

thande pani se wo nahati hai