خواب خس خانہ و برفاب کے پیچھے پیچھے

خواب خس خانہ و برفاب کے پیچھے پیچھے

گرمئ شہر مقدر کے ستائے ہوئے لوگ

کیسی یخ بستہ زمینوں کی طرف آ نکلے

موج خوں برف ہوئی جاتی ہے سانسیں بھی ہیں برف

وحشتیں جن کا مقدر تھیں وہ آنکھیں بھی ہیں برف

یاد یاران دل آویز کا منظر بھی ہے برف

ایک اک نام ہر آواز ہر اک چہرہ برف

منجمد خواب کی ٹکسال کا ہر سکہ برف

اور اب سوچتے ہیں شام و سحر سوچتے ہیں

خواب خس خانہ و برفاب سے وہ آگ بھلی

جن کے شعلوں میں بھی قرطاس و قلم زندہ ہیں

جس میں ہر عہد کے ہر نسل کے غم زندہ ہیں

خاک ہو کر بھی یہ لگتا تھا کہ ہم زندہ ہیں

khwab khas khana-o-barfab ke pichhe pichhe

garmi-e-shahr muqaddar ke satae hue log

kaisi yakh basta zaminon ki taraf a nikle

mauj-e-khun barf hui jati hai sansen bhi hain barf

wahshaten jin ka muqaddar thin wo ankhen bhi hain barf

yad yaran-e-dil awez ka manzar bhi hai barf

ek ik nam har awaz har ik chehra barf

munjamid khwab ki taksal ka har sikka barf

aur ab sochte hain sham-o-sahar sochte hain

khwab khas khana-o-barfab se wo ag bhali

jin ke sholon mein bhi qirtas-o-qalam zinda hain

jis mein har ahd ke har nasl ke gham zinda hain

khak ho kar bhi ye lagta tha ke ham zinda hain