عجب دن تھے

عجب دن تھے

عجب نامہرباں دن تھے بہت نامہرباں دن تھے

زمانے مجھ سے کہتے تھے زمینیں مجھ سے کہتی تھیں

میں اک بے بس قبیلے کا بہت تنہا مسافر ہوں

وہ بے منزل مسافر ہوں جسے اک گھر نہیں ملتا

میں اس رستے کا راہی ہوں جسے رہبر نہیں ملتا

مگر کوئی مسلسل دل پہ اک دستک دیے جاتا تھا کہتا تھا مسافر!

اس قدر نا مطمئن رہنے سے کیا ہوگا

ملال ایسا بھی کیا جو ذہن کو ہر خواب سے محروم کر دے

جمال باغ آئندہ کے ہر امکان کو معدوم کر دے

گل فردا کو فصل رنگ میں مسموم کر دے

دلاسے کی اسی آواز سے ساری تھکن کم ہو گئی تھی اور

دل کو پھر قرار آنے لگا تھا

سفر زاد سفر شوق سفر پر اعتبار آنے لگا تھا

میں خوش قسمت تھا

کیسی ساعت خوش رنگ و خوش آثار میں مجھ کو

مرے بے بس بہت تنہا قبیلے کو نیا گھر مل گیا تھا

ایک رہبر مل گیا تھا

ایک منزل مل گئی تھی اور امکانوں بھرا خوابوں سے امیدوں سے روشن

ایک منظر مل گیا تھا

ajab din the

ajab namehrban din the bahut namehrban din the

zamane mujh se kahte the zaminen mujh se kahti thin

main ik be bas qabile ka bahut tanha musafir hun

wo be manzil musafir hun jise ik ghar nahin milta

main is raste ka rahi hun jise rahbar nahin milta

magar koi musalsal dil pe ik dastak diye jata tha kahta tha musafir!

is qadar na mutmain rahne se kya hoga

malal aisa bhi kya jo zehn ko har khwab se mahrum kar de

jamal-e-bagh ainda ke har imkan ko maadum kar de

gul farda ko fasl-e-rang mein masmum kar de

dilase ki isi awaz se sari thakan kam ho gai thi aur

dil ko phir qarar ane laga tha

safar zad-e-safar shauq safar par etibar ane laga tha

main khush qismat tha

kaisi saat khush rang-o-khush asar mein mujh ko

mire be bas bahut tanha qabile ko naya ghar mil gaya tha

ek rahbar mil gaya tha

ek manzil mil gai thi aur imkanon bhara khwabon se ummidon se raushan

ek manzar mil gaya tha